Aktyor dövlət xidmətini məhkəməyə verdi: “Şou düzəldirlər”

Respublikanın Əməkdar artisti, Pantomima teatrının direktoru Elman Rəfiyev Dövlət Vergi Xidmətini məhkəməyə verib. Bu barədə Lent.az-a aktyorun özü məlumat verib.

Bu gün aktyorun barəsində onun vergi borclarına görə ölkədən çıxışına stop qoyulması barədə xəbərlər yayılıb. Bu barədə qərar Bakı Kommersiya Məhkəməsi tərəfindən çıxarılıb.

Səbəb olaraq göstərilir ki, teatrın dövlətə 150 min manatdan çox vergi borcu yaranıb.

“Dövlət Vergi Xidməti tərəfindən borcun ödənilməsi ilə bağlı məhkəmədə iddia qaldırılıb. Hakim Aytən Əliyevanın sədrliyi ilə keçirilən prosesdə iddia təmin olunub.Dövlət Pantomima Teatrının səlahiyyətli şəxsi Elman Rəfiyev olduğu üçün onun Azərbaycan sərhədlərindən kənara çıxışı müvəqətti məhdudlaşdırılıb”,- deyə xəbərlərdə qeyd edilib.

Elman Rəfiyev isə saytımıza bildirib ki, nə onun, nə də direktoru olduğu teatrın dövlətə bir qəpik də borcu yoxdur.

“Haqqımızda şou düzəldirlər, kim edir anlamıram, bu kimin marağındadır onu da anlamıram. Bu barədə məlumatı eşidən gündən mühasibimlə araşdıma aparmışıq, nazirliyə müraciət etmişik, cavab gəlməyib. İndi mən özüm Dövlət Vergi Xidmətini məhkəməyə vermişəm. Əlimdə sənədlər var. Nazirlə görüşmək istəyirəm, deyirlər telefonla danış. Telefonda mən sənədləri ona necə göstərim? Haqlı olduğumu sübut edəcəm. Mən hara gedirəm ki, çıxışıma stop qoyublar? Durmuşam teatrın qabağında”,- deyə o bildirib.