“Elektron patent məhkəməsinin hüquqi və texniki aspektləri”

Standartlaşdırma, Metrologiya və Patent üzrə Dövlət Komitəsi və Almaniya Beynəlxalq Hüquq Əməkdaşlığı Fondunun (İRZ) birgə təşkilatçılığı ilə Bakıda “Elektron patent məhkəməsinin hüquqi və texniki aspektləri” mövzusunda 2 günlük seminar başlayıb. Qurumun mətbuat xidmətindən Lent.az-a verilən xəbərə görə, 5-6 noyabrda keçiriləcək seminarda elektron patent məhkəməsi ilə bağlı Almaniya Federasiyasının təcrübəsi nümayiş etdiriləcək, bu sahənin ölkəmizdə tətbiqi imkanları müzakirə ediləcək. Bununla əlaqədar olaraq? Almaniya Federal Patent Məhkəməsinin sabiq sədri, hakim Volfgang Stoppel, hazırkı sədr, hakim Norbert Mayer və hakim Martin Musiol ölkəmizdə səfərdədirlər.

Seminar iştirakçılarına “Almaniya Federal Patent Məhkəməsində İT və elektron məhkəmə zalına dair” film nümayiş olunub. Seminarda patent müvəkkilləri, həmçinin Azərbaycan Respublikası Ali Məhkəmə, Vətəndaşlara Xidmət və Sosial İnnovasiyalar üzrə Dövlət Agentliyi, Rabitə və İnformasiya Texnologiyaları Nazirliyi, Azərbaycan Milli Elmlər Akademiyası, Naxçıvan Muxtar Respublikası Standartlaşdırma, Metrologiya və Patent üzrə Dövlət Komitəsi, Azərbaycan Dövlət Neft Akademiyası və s. qurumların nümayəndələri də iştirak ediblər.