Xəbər verdiyimiz kimi, bu gün Azərbaycan Xalq Cəbhəsi Partiyasının (AXCP) sədri Əli Kərimlinin evində axtarış aparılıb.
Dövlət Təhlükəsizliyi Xidməti (DTX) tərəfindən həyata keçirilən axtarış tədbirləri Ramiz Mehdiyevin cinayət işi ilə əlaqədardır.
Xatırladaq ki, Ramiz Mehdiyev Cinayət Məcəlləsinin 278.1 (dövlət hakimiyyətini ələ keçirməyə yönələn əməllər), 274 (dövlətə xəyanət) və 193-1.3.2-ci (cinayət yolu ilə əldə edilmiş əmlakı leqallaşdırma) maddələri ilə ittiham olunur. Onun barəsində Səbail rayon Məhkəməsinin qərarı ilə 4 ay müddətinə ev dustaqlığı qətimkan tədbiri seçilib.
Ramiz Mehdiyevin xəyanətinin başında Rusiya faktorunun olması barədə dəfələrlə mediada yazılıb.
Hətta bir müddət əvvəl Ramiz Mehdiyevin dövlət çevrilişi planı ilə bağlı Rusiyanın müəyyən dairələrinə göndərdiyi məktub da üzə çıxdı.
Məktubun mətninə görə, Mehdiyev ölkədə hakimiyyətin üç qolunun - qanunverici, icra və məhkəmə orqanlarının fəaliyyətinə nəzarəti xüsusi “Dövlət Şurası” adlı quruma həvalə etməyi təklif edib.
“Boz kardinal” “Dövlət Şurası”nın 50 nəfərdən ibarət olacağını deyib.
Ramiz Mehdiyevin 50 nəfərlik "Dövlət Şurası"nda yer alacaq şəxslərin kimliyi haqqında da mediada yazılar gedib. Onların arasında müxalifət nümayəndələri də var. Həmin müxalifətçilərdən birinin də məhz AXCP sədri Əli Kərimli olduğu xüsusi vurğulanır.
Ramiz Mehdiyevin “Dövlət Şurası” ilə Əli Kərimlinin “Milli Şura”sı
2013-cü ildə “Milli Şura” yaradılanda müxalifətdə təmsil olunan bir çox siyasətçilər bunun Rusiyanın layihəsi olduğunu etiraf edirdi. Bu gün baş verənlər onu göstərir ki, əslində, “Milli Şura” da elə Ramiz Mehdiyevin layihəsi olub.
Xarici qüvvələrin təsirinə düşən hər kəs ifşa edilməlidir
Azərbaycanda baş verən son proseslər və “Ramiz Mehdiyev İşi” siyasi sferada təmizləmə və yenilənmə zərurətini ortaya çıxardı. Uzun illər Prezident Administrasiyasına rəhbərlik edən şəxsin dövlətə xəyanət yolunu tutması və bu xəyanətin ətrafında ifşa olunan gizli planlar bunu deməyə əsas verir. İfşa olunan planlar onu göstərdi ki, Ramiz Mehdiyev anti-milli qüvvələrlə əlbir olaraq uzun illər ölkənin milli təhlükəsizliyinə təhdid olan gizli şəbəkə qurub.
Ramiz Mehdiyevin gizli şəbəkəsində ən çox Milli Şuranın, AXCP və Müsavat partiyasının adı hallanır, Əli Kərimli, Gültəkin Hacıbəyli, o cümlədən, Müsavat partiyası ilə Ramiz Mehdiyevin pərdəarxası təmaslarından bəhs edilir.
Əslində Ramiz Mehdiyevlə müxalifət arasında separat təmasların olduğu indinin məsələsi deyil. İllərdir ki, bu mövzu müzakirə olunur, Mehdiyevin radikal müxalifət təmsilçiləri ilə gizli əlaqələri barədə yazılır, deyilir. Siyasi hadisələrin inkişafı, baş vermiş proseslərin təhlilindən çıxan nəticələr bu məlumatların əsassız olmadığı qənaətinə gəlməyə imkan verir.
Rusiya nə istəyir?
Təbii ki, Rusiya Ukrayna ilə müharibəni bitirdikdən sonra Qafqaz üzərində təsir dairəsini yenidən bərpa etməyə çalışacaq. Bu şübhəsizdir. Bu məqsədlə də onlar “köhnə agentlərin” əlaqələrindən istifadə edəcəklər. Ramiz Mehdiyevə bağlı qüvvələrlə təmas quracaqlar. Qeyd olunan prosesdə radikal davranışları ilə daim seçilən, həmişə Azərbaycanın dövlət maraqlarına qarşı çıxış edən AXCP-nin öndə gedəcəyi də istisna edilmir.
Məhz buna görə də AXCP-nin vaxtında zərərsizləşdirilməsi dövlət təhlükəsizliyi üçün mühüm əhəmiyyət kəsb edir.
Milli Məclisin deputatı Elman Nəsirov deyir ki, Rusiya-Ukrayna müharibəsinin yaxın zamanlarda bitəcəyi istisna deyil:
“Rusiyanın yenidən Cənubi Qafqazda möhkəmlənmək üçün addımlar atacağını proqnozlaşdırmaq da elə də çətin deyil. Bəs kimin hesabına? Yenə də Ramiz Mehdiyev və ona bağlı olan qüvvələr hesabına. Ölkə daxilində çaxnaşma salsınlar, səfərbər olmuş cəmiyyəti parçalasınlar, vətəndaş həmrəyliyini pozsunlar, xalq ilə prezident arasındakı birliyi pozsunlar. Bunun üçün də kimdən istifadə etsinlər?! Təbii ki, Ramiz Mehdiyevə bağlı olan qüvvələrdən. Həmin qüvvələr sırasında Əli Kərimlinin də olması çoxsaylı sübutlarla təsdiqini tapır. Hesab edirəm ki, Azərbaycan hökumətinin bu gün atdığı addımlar tam məntiqli və qanunauyğundur, imkan vermək olmaz ki, böyük zəhmətlə qazandığımız uğurlara kimlərsə kölgə salsın, xalq və prezident arasındakı bağlılığı, ölkədəki sabitliyi kimsə pozsun. Bu sabitliyi göz bəbəyi kimi qorumalı və ona uzanan qara əllərin qarşısını almalıyıq. Bu nöqteyi-nəzərdən AXCP sədrinin evində axtarış aparılması, onun saxlanılması hüquqi addımdır. Bu addımlar ölkədə asayişin qorunması və dövlətimizin təhlükəsizliyinə xidmət edir”.
Siyasi və Hüquqi Araşdırmalar Mərkəzinin rəhbəri, hüquqşünas Xəyal Bəşirov da deputatla eyni fikirdədir:
“Rusiya Ukrayna ilə müharibəyə görə bir sıra yerlərdə, keçmiş postsovet ölkələrində öz mövqeyini zəiflədib. Rusiya yenidən həmin mövqeləri möhkəmləndirməyə çalışacaq. Bu yerlərdən biri də Cənubi Qafqazdır. Hansı ki, Cənubi Qafqazda yeni reallıqlar var. Bu reallıqlar Azərbaycanın regionda güclənməsini, ölkəmizin yeni reallıqlar yaratmasını diktə edir. İllərdir davam edən Qarabağ münaqişəsi artıq bitib. Bu isə Rusiyadakı bir sıra qüvvələrin, o cümlədən rəsmi Moskvanın xoşuna gəlmir. Onlar yenidən regionda əlaqələri olan şəxslər vasitəsilə möhkəmlənməyə cəhd göstərəcəklər. Ramiz Mehdiyev və komandası ətrafında aparılan ibtidai istintaq onların Rusiyanın maraqlarına xidmət etdiyini ortaya qoyur. Ramiz Mehdiyevin haqqında aparılan araşdırma, ittihamlar, məhkəmə qərarı bu faktları sübuta yetirdi. Sabiq administrasiya rəhbəri isə bu faktları təkzib etmədi. Demək ki, od olmayan yerdən tüstü çıxmaz. Azərbaycan Xalq Cəbhəsi Partiyasının sədri Əli Kərimli və onun müavininin evində axtarış aparılması, onların Ramiz Mehdiyevlə əlaqələrinin olmasına sübutdur. Deməli, illərdir daha çox qərb yönümlü fikirlər səsləndirən Əli Kərimli Rusiya üçün də çalışırmış. Bu ciddi ittihamdır. Görünür, Azərbaycanın son illər uğurları, xalq və prezident arasındakı birlik bir sıra qüvvələri narahat edib. Onlar bu sabitliyi pozmaq üçün bəzi hücrələrdən istifadə etməyə başlayıblar. Lakin hüquq-mühafizə orqanlarımız vaxtında bundan xəbər tutaraq, tədbir görür. Statusundan asılı olmayaraq, Azərbaycan dövlətinə xəyanət edən, ölkədə sabitliyini pozan istənilən şəxs mütləq cəzalandırılmalıdır. Bunu ölkəmizin qanunvericiliyi tələb edir”.
Deputat Hikmət Babaoğlu isə deyir ki, hazırda Azərbaycan milli təhlükəsizliyinin qorunmasının mühüm mərhələsinə qədəm qoyub:
“Bu prosesdə Azərbaycan dövlətinin maraqlarına və suverenliyinə qarşı addımlar atanların ifşası mərhələsindəyik. Nə qədər təzadlı görünsə də, Ramiz Mehdiyevin Azərbaycanın radikal müxalifəti ilə əlaqələndirilməsi məntiqli görünür. Ramiz Mehdiyev uzun illər Azərbaycan siyasətinin ən dərin qatlarına təsir imkanları əldə edib. Təəssüf ki, bu təsirləri Azərbaycanın dövlətçiliyinin və milli maraqlarının əleyhinə istifadə edib. Hələ 2013-cü ildə ideya oğruları Milli Şura ideyasını oğurlayıb onu müasir Azərbaycanın siyasi proseslərinə bağlamağa cəhd edərkən paradoksal hadisə baş verdi. Bu dırnaqarası Milli Şuraya və radikal müxalifətə Rusiyadan da müəyyən qüvvələr qatıldı və onlar Azərbaycanda siyasi proseslərdə dağıdıcı fəaliyyətlər üçün xeyli təsir imkanları əldə etdilər. İndi isə məlum olur ki, bütün bunları koordinasiya edən Ramiz Mehdiyev imiş. Bu da indiki mərhələdə daha təhlükəlidir, bu cür zərərli kombinasiyaların qarşısı mütləq alınmalıdır. Heç kəsə sirr deyil ki, Rusiya Ukraynadan sonra Cənubi Qafqazda möhkəmlənməyə cəhd edəcək və hər dəfə Rusiya rəsmiləri bəyanat verəndə bunu aydın şəkildə hiss edirik. Əlamətlərə gələndə isə, bəzi rayonlarda Rusiya və SSRİ bayraqlarının qaldırılması bu proseslərin nə qədər real olduğunu göstərir. Buna görə də hakimiyyəti Azərbaycanı Rusiyanın vassalına çevirməyə çalışanlara qarşı qətiyyətli konstitusion mübarizə aparmalıdır. AXCP də, Milli Şura da, onların siyasi çətiri olan Ramiz Mehdiyev və komandası da dərhal ifşa olunmalıdır. Bu cəhətdən təqdir edirəm ki, hüquq-mühafizə orqanlarımız vaxtında bundan xəbərdar olaraq, mübarizə aparırlar. Çünki Azərbaycanda legitim hakimiyyətin yeganə mənbəyi xalqdır və heç kim kənardan Azərbaycan xalqının iradəsinə diktə edə bilməz.
Məsələni bir qədər də konkretləşdirsək, Azərbaycanın siyasi sistemində daim dağıdıcı funksiya yerinə yetirən, imperiya maraqlarını, islamafobiyanı Azərbaycan xalqının maraqlarından üstün tutan AXCP sədri Əli Kərimli, onun funksionerləri, Milli Şura üzvləri, o cümlədən Cəmil Həsənli siyasi sistemimizdən birdəfəlik çıxarılmalıdır. Əks təqdirdə biz enerjimizi böyük məqsədlərə yox, daxilimizdəki Əli Kərimlilərə, Cəmil Həsənlilərə, Ramiz Mehdiyevlərə və onların radikal komandalarına sərf etmiş olacağıq. Bu isə bizim yeni milli məqsədlərimizə və milli təhlükəsizliyimizə böyük təhdidlər yaradan faktdır”.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
