Prezident:“Biz dünya miqyasında böyük dəstəyə malikik”

“Azərbaycanda aparılan iqtisadi islahatlar beynəlxalq maliyyə qurumları tərəfindən də yüksək qiymətləndirilir. Keçən rübdə dünyanın ən mötəbər iqtisadi qurumlarından biri olan Davos İqtisadi Forumu ölkələrin rəqabət qabiliyyətliliyi ilə bağlı yeni cədvəl dərc edib və Azərbaycan o siyahıda 46-cı yerdədir. MDB məkanında birinci, dünya miqyasında 46-cı. Keçən ilə nisbətən biz 9 pillə yuxarıdayır”.

APA-nın xəbərinə görə, bunu bu gün Nazirlər Kabinetinin iclasında Azərbaycan prezidenti İlham Əliyev deyib.

Prezident qeyd edib ki, makroiqtisadi sabitliyə görə Azərbaycan dünya miqyasında 18-ci yerdədir: “Əsas reytinq agentlikləri ki, hazırda Avropanın inkişaf etmiş ölkələrinin kredit reytinqlərini endirirlər, aşağı salırlar, Azərbaycanın kredit reytinqlərini artırırlar. “Fitch”, “Standard & Poor’s”, “Moody’s” – yəni 3 əsas reytinq agentliyi bizim kredit reytinqlərimizi artırıblar və bu da görülən işlər, aparılan islahatlar nəticəsində mümkün olub”.

Prezident sovet vaxtından qalmış əmanətlərə kompensasiya verilməsi prosesinin başlandığını, bütün MDB məkanında ən qısa müddət ərzində və ən yüksək əmsalla bu vəsaitin məhz Azərbaycanda veriləcəyini xatırladıb.

Ölkə başçısı orta aylıq əmək haqqı, pensiyanın artdığını, MDB məkanında bu göstəricinin ən yüksək göstəricilər arasında olduğunu deyib: “Azərbaycanda orta maaş 500 dollara bərabərdir, orta pensiya 190 dollara bərabərdir. Artım sürətlidir, ancaq bu, bizi qane edə bilməz”.

Prezident pensiya və əmək haqlarının ildən-ilə qaldırıldığını söyləyib: “Hazırda Azərbaycanda pensiyalar əmək haqlarının 40 faizini təşkil edir ki, bu da Avropanın inkişaf etmiş ölkələrinin kriteriyaları səviyyəsindədir”.

Regionlarda işlərin uğurla getdiyini deyən prezident İlham Əliyev bu ilin əvvəlindən 94 min yeni iş yeri açıldığını, onlardan 73 mininin daimi iş yeri olduğunu deyib: “Regionların sosial-iqtisadi inkişafı proqramının əvvəlindən - 2004-cü ildən bəri bir milyon 100 min iş yeri açılıb ki, onlardan 800 mini daimi iş yeridir”.

Sosial infrastrukturun yaradılması istiqamətində böyük nailiyyətlər olduğunu vurğulayan ölkə başçısı il ərzində 188 məktəb və əlavə korpuslar tikildiyini, 103 məktəbin əsaslı təmir edildiyini deyib: “Bu proses həm Bakıda geniş vüsət almışdır, həm də bölgələrdə. Bakı məktəblərinə gəldikdə, gələn tədris ilinə qədər nəinki qəzalı vəziyyətdə, heç bir dənə də olsun, təmirsiz məktəb qalmayacaq. Bölgələrdə də bu istiqamətdə böyük işlər gedir. Yəqin ki, bölgələrdə bütün məsələni tam şəkildə həll etmək üçün bir qədər çox vaxt lazım olacaq”.

Azərbaycan Olimpiya və Paralimpiya oyunlarındakı nəticələrindən söz açan ölkə başçısı olimpiyaçılarımızın dünyada medalların sayına görə 24-cü, keyfiyyətinə görə 30-cu, Avropa ölkələri arasında 15-ci, İslam ölkələri arasında 3-cü yerdə olduğunu deyib. Paralimpiyaçılarımız isə 27-ci yerə çata biliblər, onlar 12 medal qazanıblar ki, bunun da dördü qızıldır: “ İdmanın inkişafı üçün dövlət vəsaiti, dövlət dəstəyi lazımdır, təlim-məşq prosesi yüksək səviyyədə keçirilməlidir, infrastruktur layihələri lazımdır. Azərbaycanda 35 regional Olimpiya Mərkəzi fəaliyyət göstərir və artıq 10-a yaxın yeni Olimpiya İdman Kompleksi tikilməkdədir”.

Azərbaycanın beynəlxalq arenada da uğurlar əldə etdiyini vurğulayan prezident ölkəmizin BMT Təhlükəsizlik Şurasının iclaslarında fəal iştirak etdiyini və prinsipial mövqe nümayiş etdirdiyini bildirib: “ Keçən ilin oktyabr ayında, - artıq bir il keçir, - biz Təhlükəsizlik Şurasına üzv olduqda, mən o vaxt xalqa müraciətimdə demişdim ki, biz bu qurumda ədaləti və beynəlxalq hüququ müdafiə edəcəyik və bu sözə həmişə olduğu kimi, əməl edirik. Bizim mövqeyimiz böyük rəğbətlə və böyük hörmətlə qarşılanır. Çünki bir daha demək istəyirəm ki, biz ədaləti və beynəlxalq hüququ müdafiə edirik”.

Prezident bildirib ki, BMT TŞ üzvlüyünə seçkilər zamanı Azərbaycana göstərilən dəstək artıq özünü digər formatlarda büruzə verir: “Bildiyiniz kimi, Azərbaycanın namizədliyini 155 ölkə dəstəkləmişdir. Bu yaxınlarda Qoşulmama Hərəkatının zirvə görüşündə 120 ölkə Ermənistan-Azərbaycan, Dağlıq Qarabağ münaqişəsinin yalnız və yalnız ölkələrin ərazi bütövlüyü çərçivəsində həll olunmasına dair qətnamə qəbul etmişdir. Bu, bizim növbəti böyük diplomatik uğurumuzdur, Ermənistanın növbəti məğlubiyyətidir. Çünki 120 ölkə dünya ictimaiyyətinin əksəriyyətini təşkil edir. Dünyada 200-dən bir qədər çox ölkə var. Bunlardan 120-si ərazi bütövlüyümüzü dəstəkləyir, münaqişənin həllini yalnız bu prinsiplər əsasında görür. Əgər biz NATO-nun Çikaqo sammitinin qərarlarını, bəyannamələrini nəzərə alsaq, - təbii ki, NATO-ya üzv olan ölkələr Qoşulmama Hərəkatının üzvü ola bilməz, - orada da Ermənistan-Azərbaycan, Dağlıq Qarabağ münaqişəsinin yalnız ölkələrin ərazi bütövlüyü prinsipi əsasında həll olunması açıq şəkildə vurğulanıb. Bu da ermənilərin növbəti məğlubiyyəti, bizim növbəti uğurumuzdur. Yəni, dünya birliyinin dörddə üç hissəsi məsələnin həllini yalnız ərazi bütövlüyü prinsipi əsasında görür. Əlbəttə, bu, çox ədalətli mövqedir və məsələnin həlli üçün başqa mövqe, başqa variant ola bilməz”.

Prezident qeyd edib ki, ermənilərin “xalqların müqəddəratını təyinetmə prinsipləri” adı ilə dünya birliyini çaşdırmaq istəyinin uğursuzluqla nəticələndiyini də beynəlxalq təşkilatlarda qəbul olunan qərarlar və bəyannamələr təsdiqləyib: “ Xalqların öz müqəddəratını təyinetmə prinsipləri ölkələrin ərazi bütövlüyü çərçivəsində həll edilməlidir. Helsinki Yekun Aktının sənədlərində məsələ məhz belə qoyulub. Ona görə, bütün bu növbəti diplomatik uğurlar, siyasi qələbələr, Ermənistan üzrə mütləq qələbəmiz bizi daha da ruhlandırır və məsələnin həllinə yaxınlaşdırır.
Biz daha da güclü olmalıyıq və oluruq. Beynəlxalq mövqelərimizi möhkəmləndiririk, dünya miqyasında böyük dəstəyə malikik”.

Prezident Azərbaycana əməkdaşlıq üçün ənənəvi olmayan qitələrdən, xüsusilə Latın Amerikasından böyük maraq olduğunu bildirib: “Biz də Latın Amerikası ölkələri ilə çox sıx əlaqələr qururuq və görürük ki, bu əlaqələr çox səmimidir, qarşılıqlı hörmət, qarşılıqlı maraqlar və dostluq əsasında qurulur. Münasibətlər hər bir ölkə ilə məhz bu prinsiplər üzərində qurulmalıdır. Biz bunu dəfələrlə bəyan etmişik. Mən dəfələrlə demişəm ki, Azərbaycan ancaq bərabərhüquqlu münasibətləri qəbul edir. Əgər kimsə fikirləşirsə ki, öz iradəsini bizə qəbul etdirə bilər, səhv edir. Biz ancaq bərabərhüquqlu, qarşılıqlı maraqlar, bir-birinin işinə qarışmamaq prinsiplərini qəbul edirik. Biz Latın Amerikası ölkələri ilə münasibətlərimizi məhz bu prinsiplər əsasında sıx bağlayırıq və hesab edirəm ki, həm xarici siyasət və həm də iqtisadi məsələlərin həlli üçün bu istiqamət çox perspektivlidir. Həm xarici siyasət sektoruna, həm iqtisadi məsələlərlə bağlı olan qurumlara müvafiq tapşırıqlar verilib ki, biz Latın Amerikası ölkələri ilə münasibətlərimizi daha da sürətlə qurmalıyıq. Əlbəttə, ənənəvi tərəfdaşlarla da bizim dostluq münasibətlərimiz var. Təbii ki, bu əlaqələr davam etdiriləcək”.