İnsanları yenidən gəncləşdirə bilən dərman yaradıldı

Harvardın tibb alimləri insanlara gəncliyi bərpa etməyə kömək edə biləcək "qocalma əleyhinə həblər" yaratmaqda irəliləyiş əldə ediblər.

Lent.az xarici mediaya istinadla bildirir ki, onlar insan və siçan dəri hüceyrələrində qocalma prosesini geri qaytara bilən altı kimyəvi birləşmə tapıblar. Bu maddələr bir neçə il cavanlaşdırıcı təsir göstərməyi bacarır.

Harvard Tibb Məktəbini təmsil edən tədqiqatın müəlliflərindən biri Devid Sinkler bu kəşfi əsl sıçrayış və bütün insan orqanizminin cavanlaşması istiqamətində mühüm addım hesab edir. Onun sözlərinə görə, insan sınaqları gələn ildən başlaya bilər.

Eyni zamanda bəzi alimlər tədqiqatın hələ ilkin mərhələdə olduğunu vurğulayırlar.

Əvvəlki genlərə əsaslanaraq, araşdırmalar hüceyrələrin qocalmasının qarşısını almaq və onları gənc genlərə çevirmək yollarını axtarırdı. Alimlər qocalma prosesini geri qaytara və insan hüceyrələrini cavanlaşdıra bilən milyonlarla molekul birləşməsini sınaqdan keçiriblər. Nəticədə qocalmış hüceyrələri bir həftədən az müddətdə gənclik vəziyyətinə qaytaran altı kimyəvi kokteyl müəyyən edilib.

Sinklerin sözlərinə görə, bu kimyəvi maddələr həm siçanlarda, həm də insanlarda sınaqdan keçirilib və nəticələr onların qocalmanı yavaşlatdığını göstərir. Alimlər hesab edirlər ki, onların yeni kəşfi orqanizmi cavanlaşdıran vasitələr hazırlamaq və hətta yaşa bağlı xəstəliklərin müalicəsinə kömək etmək üçün istifadə edilə bilər.

Ancaq bütün bioloqlar bu araşdırmanın nəticələri ilə razılaşmırlar. Çoxları hesab edir ki, elm adamları hüceyrə qocalmasının ləngiməsinin siçanlarda yaşa bağlı sağlamlıq problemlərinin azalmasına səbəb olduğunu sübut etməlidirlər, ona görə də hələlik bu tədqiqat yalnız ilkin addım olaraq qalır.