Ruslar azərbaycanlı aktyorların ifasında "Fedra" və "Maskarad"a baxacaqlar

Səməd Vurğun adına Azərbaycan Dövlət Rus Dram Teatrının kollektivi Sankt-Peterburqa qastrol səfərinə gedib.

Teatrdan Lent.az-a verilən məlumata görə, qastrol zamanı Vasilevskidəki Dövlət Dram Teatrının səhnəsində 2 tamaşa nümayiş etdiriləcək.

Noyabrın 11-də xalq artisti, teatrın baş rejissoru Aleksandr Şarovskinin quruluş verdiyi Mixail Lermontovun "Maskarad" tamaşası oynanılacaq. Bu tamaşada rejissor həm də Arbenin rolunu ifa edir. Xatırladaq ki, tamaşanın premyerası 2013-cü il noyabrın 24-də olub. Tamaşa məşhur rus şairi M.Lermontovun 200 illik yubileyinə həsr olunub.

Noyabrın 12-də isə peterburqlular A.Şarovskinin daha bir quruluşunu izləyəcəklər. Rusiyalı sənətsevərlər üçün məşhur fransız dramaturqu Jan Rasinin "Fedra" tamaşası nümayiş etdiriləcək. Hər iki tamaşa Mədəniyyət və Turizm Nazirliyinin sifarişi ilə hazırlanıb.

Qastrol səfəri noyabrın 13-də başa çatacaq.