Ramil Qasımov: "Sevinirəm ki, zəhmətim hədər getmədi"

Bu gün ölkə başçısı İlham Əliyevin imzaladığı sərəncamla bir qrup mədəniyyət xadiminə fəxri adlar verilib. Fəxri adlara layiq görülən sənət adamları arasında Azərbaycan Televiziya və Radio Verilişləri Qapalı Səhmdar Cəmiyyətində musiqi kollektivlərinin bədii rəhbəri və Səsyazma Evinin direktoru Ramil Qasımov da var. Gənc vokalçı əməkdar artist fəxri adına layiq görülüb. Bununla bağlı təəssüratlarını Ramil Qasımov Lent.az-a bölüşüb. Sənətçi ona göstərilən etimada görə məmnun olduğunu deyib: “Çox sevinirəm ki, bu zamana kimi çəkdiyim zəhmətim hədər getmədi. Azərbaycanın əməkdar artisti olduğuma görə fəxr edirəm. Mənə göstərilən etimada görə, ölkə başçısına təşəkkür edirəm. Bundan sonra da bu etimadı doğrultmağa çalışacam. Azərbaycan musiqisinin dünyaya çatdırılmasında, milli musiqi sənətimizin inkişafında əlimdən gələni əsirgəməyəcəm”.