Nəbi Xəzrinin 90 illik yubileyi qeyd ediləcək

Noyabrın 17-də Azərbaycan Respublikası Mədəniyyət və Turizm Nazirliyinin Mədəniyyətşünaslıq üzrə Elmi-Metodiki Mərkəzinin təşkilatçılığı ilə Azərbaycan və SSRİ Dövlət mükafatları laureatı, Sosialist Əməyi Qəhrəmanı, Xalq Şairi Nəbi Xəzrinin 90 illik yubileyinə həsr olunmuş “Ədəbiyyatımızın Xəzrisi” mövzusunda “dəyirmi masa” keçiriləcək. Lent.az-ın məlumatına görə, tədbir prezidentin Nəbi Xəzrinin 90 illik yubileyinin keçirilməsi haqqında müvafiq sərəncamına uyğun olaraq təşkil ediləcək.

Tədbirdə Azərbaycan Dillər Universitetinin Azərbaycan dili və ədəbiyyatı kafedrasının müdiri, professor Fəridə Səfiyevanın “Yüksək duyğular şairi”, Azərbaycan Milli Elmlər Akademiyasının Nizami Gəncəvi adına Ədəbiyyat İnstitutunun böyük elmi işçisi, filologiya üzrə fəlsəfə doktoru Rasim Nəbioğlunun “Nəbi Xəzrinin yaradıcılığında dini-fəlsəfi mövzu və obrazların psixoloji səciyyəsi”, şairi oğlu Arzu Babayevin “Xatirələrdə yaşayan xoşbəxt şair” mövzusunda məruzələri dinlənəcək.

Qeyd edək ki, Azərbaycan Dillər Universitetinin filologiya fakültəsinin tələbələrinin ifasında Nəbi Xəzrinin şeirləri əsasında hazırlanmış ədəbi-bədii kompozisiya nümayiş olunacaq.