Azər Paşa Nemətov təkzib etdi: "Elə hadisə olmayıb"

Akademik Milli Dram Teatrının bədii rəhbəri və baş rejissoru Azər Paşa Nemətov mədəniyyət və turzim nazirinin müavini Ədalət Vəliyevin teatrın direktoru İsrafil İsrafilovu tənqid etməsinə dair yayılan xəbərlərə münasibət bildirib. Lent.az-ın məlumatına görə, baş rejissor senyabrın 8-də nazirliyin kollegiya iclasında iştirak etdiyini və nazir müavininin İ. Israfilovu tənqid etmədiyini açıqlayıb: “Mən heç kimi müdafiə etmək fikrində deyiləm. Lakin Ədalət müəllimin fikirləri mətbuatda düzgün getməyib. Mən də həmin iclasda idim. İclas iki saata yaxın davam etdi. Ədalət müəllim bütün teatrların rəhbərləri ilə görüşdü, işlərlə maraqlandı”.

Xatırladaq ki, sözügedən iclas Səməd Vurğun adına Rus Dram Teatrında baş tutub. Mədəniyyət və Turizm Nazirliyinin təşkil etdiyi iclasda respublikanın bütün regionlarının teatr direktorları, baş rejissorları iştirak edib.

AzNews.az saytı isə iclasda ən çox Akademik Milli Dram Teatrının direktoru İsrafil İsrafilovun tənqid olunduğunu qeyd edib. Xəbərdə bildirilib ki, mədəniyyət və turizm nazirinin birinci müavini Ədalət Vəliyev çıxışı zamanı İ.İsrafilovun əleyhinə kəskin ifadələr səsləndirib: "Gör teatrı nə günə qoymusan ki, orada xalq artistləri bir-birinə hücum çəkir və bu da respublika ilə bir olur. Biz səni 3 ay əvvəl çıxartmaq istədik, amma vaxt verdik ki, bəlkə düzələsən. Sən işi bacarmırsan".

Məlumata görə bildirək ki, kollegiya iclasında "Azdrama"nın direktorunun fəaliyyətinin qəbuledilməz olduğu deyilib.