“Arzu və Murad” təqdim olundu

Azərbaycan Dövlət Gənc Tamaşaçılar Teatrında “Arzu və Murad” tamaşanın premyerası olub. Lent.az-ın məlumatına görə, tamaşa Sevinc Elsevərin “Ürəyində arzu tut” pyesi əsasında hazırlanıb. Səhnə əsərinin quruluşçu rejissoru Gülnar Hacıyeva, bədii rəhbəri, teatrın baş rejissoru, əməkdar incəsənət xadimi Bəhram Osmanovdur.

Yeni səhnə əsərində əsas obrazları əməkdar artist Gülər Nəbiyeva, aktyorlar Roza İbadova, Səbinə Məmmədova, Güşvər Şərifova, Nuriyə Əliyeva, Anar Seyfullayev, Eşqin Quliyev, Vüsal Mehrəliyev, Kərəm Hadızadə, Elşən Şıxəliyev, İlham Əsədov ifa edir.

Xocalı faciəsi baş verən zaman əsir düşmüş gənc qızın acı taleyi, qaçqınlıq şəraitində yaşayan insanların saf hissləri, psixoloji və mənəvi durumu yeni səhnə əsərinin əsas ideyasını təşkil edir.

Qeyd edək ki, əsər “Anamın kitabı” ədəbi müsabiqəsinin qalibi olub. Tamaşanın yekununda 2015-ci il üçün “Anamın kitabı” ədəbi müsabiqəsinin mükafatlandırma mərasimi baş tutub. Azərbaycan Milli Elmlər Akademiyasının Ədəbiyyat İnstitutu, Azərbaycan Dövlət Gənc Tamaşaçılar Teatrı və “Hədəf” Nəşrlər Evinin birgə təşkilatçılığı ilə həyata keçirilmiş “Anamın kitabı” ədəbi mükafatı pyes müsabiqəsi – 2015-də fəal iştirakına görə Vüsal Məmmədzadə, Orxan İsmayıl, Nərgiz İsmayılov müsabiqədə fəal iştiraklarına görə diplomla təltif olunublar.

Mükafatın Fəxri Fərmanları “Qarabağ savaşçısı – topçu İskəndər” əsərinə görə Dilman Şahmərdanlıya (17 bal) və “Qızıl heraldika” əsərinə görə Xəyalə Murada (18 bal) təqdim edilib.

Müsabiqədə 2-ci yerin qalibi “Qar gözlərkən” əsəri ilə Enur Rzayev (25 bal), 3-cü yerin qalibi “Erməni lavaşı” ilə Ülviyyə Mustafayeva (21 bal), 4-cü yerin qalibi “Yurd itkisi” əsəri ilə Zaur Vedili (20 bal) müəyyən edilib.