“Yeddi gözəl” Başqırdıstan Opera və Balet Teatrının səhnəsində

İyunun 8-i və 9-da Ufada bu tamaşanın premyerası keçirilib. Azərbaycan Dövlət Akademik Opera və Balet Teatrının mətbuat xidmətindən Lent.az-a verilən məlumata görə, premyera Rudolf Nureev adına Beynəlxalq balet sənəti festivalının açılışı çərçivəsində baş tutub. Tamaşanın quruluşu baletmeyster Rinat Abuşaxmanov tərəfindən həyata keçirilib. Musiqi rəhbəri və dirijor Rauşan Yakupov, stenoqrafiyanın müəllifi Sankt-Peterburqlu rəssam Varvara Çuvina, işıq üzrə rəssam Sərdar Çarıyevdir.

İyunun 8-də baş tutan ilk premyera anşlaqla keçib və böyük uğur qazanıb. Başqırdıstanın dövlət məmurları da tamaşanı izləyib. Tamaşadan sonra hər kəs “Yeddi gözəl” baleti haqqında sevinc və heyranlığını ifadə edən fikirlər söyləyib.
Rəssam Varvara Çuvina deyib ki, tamaşanın öz bədii səviyyəsinə görə Qara Qarayevin gözəl musiqisinə uyğun olması üçün çox çalışıblar: “Səhnə kostyumlarının rəngarəngliyi, işıq və rənglərin dəyişməsi səhnədə Nizami Gəncəvinin eyniadlı poemasının əsas süjet xəttini ifadə edir. Sehrli və müdrik şərq nağılının səhnə təcəssümünü tam şəkildə ifadə etmək məqsədilə teatrın bütün texniki vasitələri tərəfimizdən bu tamaşa üçün səfərbər edilib”.
Xəyalə