Məşhur rəssamların əsərləri sığortalanıb

Nazirlər Kabineti yanında “İçərişəhər” Dövlət Tarix-Memarlıq Qoruğu İdarəsindən Lent.az-a verilən məlumata görə, mədəni irsimizin qorunub saxlanaraq gələcək nəsillərə ötürülməsi məqsədi ilə sığortalanan rəsm əsərləri arasında Toğrul Nərimanbəyovun “Bakı Qədim Şəhər”, Tofiq Kərimovun “Qız Qalası”, Elbəy Rzaquliyevin “Şirvanşahlar Sarayı” və “Köhnə Küçə”, Hafiz Məmmədovun “Qoşa Qapı”, Rafiq Mehdiyevin “İçərişəhərdə”, Eyyub Məmmədovun “Şirvanşahlar”, Mahmud Tağıyevin “İçərişəhər”, Böyükağa Mirzəzadənin “Qala” və “Qız Qalası” kimi əsərlər var.
Milli rəssamlıq sənətimizin inkişafında xüsusi xidmətləri olan bu istedadlı sənətkarların İçəri Şəhərin tarixi abidələri və müxtəlif görüntüləri əks olunan əsərlərində qədim məkanın tarixi ruhu rəsm dili ilə özünəməxsus tərzdə ifadə olunub.
“İçərişəhər” Dövlət Tarix-Memarlıq Qoruğu İdarəsi özəl şirkətlərin Azərbaycanın tarixinə, mədəni irsinə və incəsənətinə göstərdikləri qayğını təqdir edir və gələcəkdə bu cür təşəbbüsləri dəstəkləməyə hazır olduğunu bildirir.