Məlahət Abbasova İsrafil İsrafilova sərt cavab verdi

Türkiyədə fəaliyyət göstərən tanınmış aktrisa Məlahət Abbasova “Facebook” şəbəkəsindəki şəxsi səhifəsində Azərbaycan Dövlət Akademik Milli Dram Teatrının direktoru İsrafil İsrafilovun yanvarın 31-də Lent.az-da gedən müsahibəsinə münasibət bildirib.

Məlahət Abbasova İsrafil İsrafilovun bəzi fikirlərinə qatılsa da, fəqət nə etmək istədiklərini heç cür anlamadığını söyləyib. O, bir aktrisa olaraq ilk addımını atdığı, bu günlərə gəlməyinin ən böyük səbəbi olan Azərbaycan Milli Dram Teatrının gələcəyindən son dərəcə narahat olduğunu dilə gətirib: “Qorxu altında, basqı altında sənət olmaz. Hökmranlıqla nizam-intizam arasındakı incə cizgini hörmətli İsrafilovun nəzərə alacağını, Azərbaycan teatrının dünya teatrları səviyyəsinə yüksələcəyini düşünürəm. Bunun tərsi çox böyük fəlakətlər doğurur. İnşallah, yanılaram. İllərini teatra həsr etmiş dəyərli sənətçilərin “işin yoxsa, sənin teatrda nə işin var?” deyib - binaya alınmamasına şok oldum, üzüldüm, utanc duydum. Deməli, binanın daşları aktyor və aktrisalardan, rejissorlardan daha dəyərli imiş. Dünyanın heç bir yerində heç bir aktyora belə hörmətsizlik olmaz və edilməz də. Məşqləri, tamaşaları olmasa da, tapdıqları boş otaqlarda sabahlara qədər məşqlər edən, çalışan türk aktyorlar adına belə bir şey Türkiyə teatrlarında olsaydı, necə olardı, deyə düşündüm. Sonu fəlakət olardı. Azərbaycan Milli Dram Teatrı hər 3-4 ildə bir dəyişən rəhbərlərlə var olmadı. O, içəri alınmayan oyunçularla, rejissorlarla, yaradıcı qrupla var oldu. Ora onların evidir. İllərlə ölkəmdən uzaqlarda Azərbaycan mədəniyyəti adına təmənnasız işlər görən, Azərbaycan teatr sənətini, teatr əsərlərini başqa ölkələrdə təmsil edən, bu xidmətlərimə görə mükafatlar alan bir sənət insanı olaraq, dəyərli sənətçilərimizi evinə almayan o şəxslərdən soruşuram: “Bəs sizin orda nə işiniz var? Evinə buraxmadın o sənətçilərin əməyi qədər o teatrda əməyiniz varmı?”

Məlahət Abbasova bu durumun tezliklə düzələcəyinə, rəhbərliklə yaradıcı qrupun əl-ələ verib Azərbaycan teatrının rifahı naminə birlikdə addım atacaqlarına ümidvar olduğunu deyib: “Bu mövzuda heç vaxt səssiz qalmayacağam”.