Sənətçilərimiz Azərbaycanı Berlində təmsil edib

Tədbirə təhsil naziri Misir Mərdanov, gənclər və idman naziri Azad Rəhimov, millət vəkilləri, Elmlər Akademiyasının üzvləri, elm və sənət adamlarından ibarət nümayəndə heyəti qatılıb.

Elm və mədəniyyət günləri çərçivəsində simpozium, konfrans keçirilib, Humbolt Universitetində Azərbaycan tarixi fakültəsinin açılışı olub. Sonuncu gün isə sənətçilərimiz – xalq artistləri Aygün Bayramova, Mənsum İbrahimov, Azər Zeynalov, əməkdar artistlər Zemfira İsmayılova, Elçin Həşimov, Elnur Əhmədov, əməkdar incəsənət xadimi Yalçın Adıgözəlovun drijorluğu altında konsert proqramı ilə çıxış ediblər.

Mənsum İbrahimovun Lent.az-a verdiyi məlumata görə, onları Almaniyanın Kamera Orkestri müşayiət edib. Solo ifalarla yanaşı duetlər də ifa olunub. Aygün Bayramova və Mənsum İbrahimov “Leyli və Məcnun”dan, Zemfira İsmayılova və Azər Zeynalov isə “Arşın mal alan”dan parça səsləndirib. Sonda ifa olunan “Qarabağ şikəstəsi” isə tamaşaçılar tərəfdən xüsusi maraqla qarşılanıb. “Nəinki konsert, bütün tədbir yüksək səviyyədə keçdi və hamının marağına səbəb oldu” - deyə, Mənsum İbrahimov əlavə edib.

Xəyalə Muradlı