“Böyük səhnəyə yol” bölgələrdən də keçəcək

Layihə rəhbəri, əməkdar artist Aybəniz Haşımovanın Lent.az-a verdiyi məlumata görə, layihə çərçivəsində ilk konsert proqramının Gəncədə təşkil olunması nəzərdə tutulub. Daha sonra isə konsertlər silsilə olaraq bütün bölgələrdə davam etdiriləcək. Bu gün isə layihə çərçivəsində Şağan qəsəbəsində yerləşən uşaq evində layihənin dörd istedadının iştirakı ilə xeyriyyə konserti təşkil olunacaq. Bölgələrdə baş tutacaq silsilə konsertlərdə isə bütün layihə iştirakçıları - gənc müğənnilər iştirak edəcək.

Aybəniz Haşımovanın sözlərinə görə, artıq bölgələrdəki konsertlərlə bağlı təşkilatçı Heydər Əliyev Sarayı tərəfindən lazımi danışıqlar aparılıb. “Böyük səhnəyə yol” çərçivəsində Heydər Əliyev Sarayında növbəti konsert noyabrın 31-ə planlaşdırılır. Bu layihədə peşəkar ifaçılar və istedadlı gənc müğənnilər, Milli Konservatoriyanın, Üzeyir Hacıbəyli adına Bakı Musiqi Akademiyasının, Azərbaycan Dövlət Mədəniyyət və İncəsənət Universitetinin, Bülbül adına Musiqi Məktəbinin məzunları və tələbələri çıxış edirlər.

Xəyalə