Aygün Kazımovanın pasportu xidməti imiş

Bu gün mətbuatda xalq artisti Aygün Kazımovaya diplomatik pasport verilməsi ilə bağlı məlumat yayılıb. Lent. az-ın məlumatına görə, xəbərdə bildirilir ki, Aygün Kazımova keçən ilin noyabr ayından bəri xarici ölkələrə diplomatik pasport vasitəsi ilə gedib-gəlir.

Lakin həmin məlumatda pasportun seriyasının “S” kateqoriyasına aid olduğu göstərilir. Bu məqam bəzi suallar yaradıb. Hüquqşünas Əlövsət Əliyev Lent. az-a açıqlamasında bildirib ki, diplomatik pasportların seriyası bir qayda olaraq “D” hərfi ilə işarələnir və bu məqam sənədin üzərində də açıq-aydın qeyd edilir: “Azərbaycan qanunvericiliyinə əsasən, ölkədə həm diplomatik, həm də “S” kateqoriyasına aid olan xidməti pasportlar Xarici İşlər Nazirliyi tərəfindən verilir. Bu pasportlara yiyələnə biləcək şəxslərin siyahısı da qanunla dəqiq müəyyən edilib. Əslində Aygün Kazımovaya xidməti pasportun verilməsi də müəyyən qədər mümkünsüz görünə bilər. Lakin onun xalq artisti adına layiq görülməsi, ictimai mövqeyi belə bir pasport almasına yol aça bilər”.