Samirə Əfəndi İsraildə savaşın ortasında QALDI - YENİLƏNİB

"Hərbi əməliyyatlara görə İsraildə çətin vəziyyətdə qalan, hazırda sığınacaqda olan müğənni Samirə Əfəndi ilə bu dəqiqələrdə əlaqə saxladım, özü və yanındakı 4 nəfər həyəcanlı anlar yaşasalar da, yaxşıdırlar".

Lent.az-ın xəbərinə görə, bunu Diasporla İş üzrə Dövlət Komitəsinin mətbuat xidmətinin rəhbəri Vəsilə Vahidqızı deyib.

"Onların sağ-salamat vətənə qayıtmaları üçün Diasporla İş üzrə Dövlət Komitəsi və İsraildə olan diaspor təşkilatları əllərindən gələni etməyə hazırdırlar. Gün ərzində Samirə xanımla yenidən əlaqə yaradacağıq", - deyə o qeyd edib.

***

Saat: 14:19

Xəbər verdiyimiz kimi, Qəzza zolağından İsrail ərazisinə raket hücumlarına start verilib.

Lent.az-ın məlumatına görə, Azərbaycanı 2021-ci ildə “Avroviziya” beynəlxalq mahnı yarışmasında təmsil edən müğənni Samirə Əfəndi ailə üzvləri və meneceri Aydan Topçubaşova ilə birlikdə Tel-Əviv şəhərində çətin vəziyyətə düşüb.

Samirə qaldığı evin pəncərəsindən şəhərə açılan mənzərəni çəkərək sosial şəbəkə hesabında yayımlayıb. O, paylaşımına “5 min raket... Hava limanı bağlanıb, Tel-Əviv partlayır. Partlayış və həyəcan səsləri qorxudur. Bizə otelin sığınacağına düşməyimizi deyirlər. Ümid edirik ki, hər şey keçəcək. Allah, insanları qoru Allahım sən özün insanları qoru. Amin!”, sözlərini yazıb.

Qeyd edək ki, İsrailin Baş naziri Benyamin Netanyahu ölkə əhalisinə müraciətində “İsrail vətəndaşları, biz müharibə vəziyyətindəyik. Bu, əməliyyat, döyüş deyil, müharibədir” yazıb.

Azərbaycanın İsraildəki səfirliyi hazırda sığınacaqda olan müğənni Samirə Əfəndi və yaxınları ilə təmasdadır.