Heç Rəşad Dağlını azadlıqda belə sevmirdilər - REPLİKA

Ötən günlərdə "Space TV"-nin efirində ağır cinayətə görə həbs edilən Rəşad Dağlının təntənəli doğum günü keçirildi. Verilişə Tarix Əliyev (Tolik) aparıcılıq edib. Həmin buraxılışda Rəşad Dağlının dostları olan meyxanaçılar yığışıb onun adına qafiyə açır, meyxana deyirdilər.

...Məsələnin "əmma"sı başqadır. Hansısa müğənni açıq-saçıq geyimdə efirə çıxanda hamı televiziyanı, aparıcını, müğənnini tənqid edir ki, əxlaqsızlığı təbliğ edirsiniz. Yaxşı, bəs niyə bir nəfər çıxıb demir ki, cinayətkarlığı, məhkumluğun təbliğatını aparırsız? Verilişə baxan yeniyetmə cinayət törədən, adam öldürən birinin tərəfinin tutulduğunu, adına meyxana deyildiyini, azadlığa çıxması üçün çağırışları görəndə cinayətə, həbsə rəğbət bəsləməyəcək? Başa düşürəm, Rəşad Dağlı meyxana dinləyiciləri üçün böyük sənətkar hesab olunur, amma bu, onun cinayət törədəcəyi, adam öldürməsinə göz yumulacağı, təbliğatının aparılacağı mənasına gəlmir.

Tarixdə bir çox yazıçılar, sənət adamları var ki, törətdikləri cinayətə görə həbs ediliblər. Məsələn, Fransız yazıçı Jen Qenet oğurluq və fırıldaqçılığa görə həbs edilib. Onda kimsə deməyib ki, Qenet böyük yazıçıdır, onu həbs etməyək və ya cəzasını azaldaq. Hələ Qenet Rəşad Dağlı ilə müqayisə edilməyəcək qədər böyük yazıçıdır.

Onsuz da meyxana yetərincə "vorovskoy" aləmi, həbsxanaları, narkomaniyanı təbliğ edir, heç olmasa, bunu efirlərə daşımayın. Çox meyxanada səslənən "Allah içəridəkilərin qapısını açsın" ifadəsi özü gənclərdə, yeniyetmələrdə cinayətkarlığa rəğbət yaradır.

Kim nə qədər çox sevsə də, başa düşməlidir ki, Rəşad Dağlı qəsdən adam öldürüb və hazırda həbsdədir. Həbsdə olan birinə doğum günü keçirib onu sevən kütlədən reytinq, xal toplamağa çalışmaq isə...

Məsələnin bir də Tolik tərəfi var. Audiovizual Şuranın kanala xəbərdarlığından sonra paylaşım edib ki, Rəşada görə veriliş bağlansa, vecimə olmaz: "Təki pozğunlara görə yox, şairə görə bağlansın".

Pozğunluq kimi, heç cinayətkarlığı da təbliğ etmək doğru deyil. Sonda onu da deyək ki, heç Rəşad Dağlını azadlıqda belə sevmirdilər.