Gözəllik müsabiqəsindəki qalmaqala aydınlıq gətirildi -

Lent.az-ın məlumatına görə, bununla bağlı keçirilən mətbuat konfransında müsabiqənin təşkilat rəhbəri Kamal Cenk qaranlıq məqamlardan danışıb. O, bildirib ki, yayılan xəbərlər həqiqəti əks etdirmir: “Müsabiqədə hansısa bir məbləğ söhbətinin olması həqiqəti əks etdirmir. Əgər onu deyən şəxslərin əlində sübutu varsa, gətirib göstərsinlər”.

Münsiflər heyətinin üzvü Cengiz Aşkının naməlum şəxslər tərəfindən döyülməsinə gəlincə isə Kamal Cenk bildirib ki, o, bunu reytinq xatirinə edib: “Cengizə keçmiş olsun deyirəm. O, kimlərinsə sözü ilə hərəkət etdi. Diana xanıma söz verib ki, onu birinci edəcək. Amma əslində hər şey obyektiv olaraq keçdi. Cengiz burada aldadan tərəf oldu. Ona görə də cəzasını aldı”.

Təşkilat Komitəsinin sədri Fərid Bağırov deyir ki, Cengizi xəstəxanaya o aparıb: “Amma onu Musa Nağıyev adına xəstəxanaya apararkən o bildirdi ki, yoldaşları ilə futbol oynayarkən toqquşublar. Ondan bir gün sonra isə polislərə naməlum şəxslər tərəfindən döyüldüyünü iddia edib. Mən ona zəng edərkən, foto çəkdirdiyini söylədi. Dedi ki, informasiya agentliklərinə yollamaq istəyirəm. Bu adam sırf özünü reklam etmək üçün gəlibmiş və cəzasını da çəkdi”.

Hazırda Cengizin münsiflər sırasından uzaqlaşdırıldığını deyən layihə rəhbəri yarışlara qatılan Diana ilə də münasibətlərə də aydınlıq gətirib: “Diana müsabiqədə ən iddialı iştirakçı hesab edirdi özünü. Həm də düşünürdü ki, o, hamıdan gözəldir və birinci o seçiləcək. Amma gördüyünüz kimi, bütün münsiflər məhz Aytacın gözəl olduğunu söyləyərək, onu qalib etdilər. O, ən layiqli namizəd idi. Biz bu müsabiqəni Azərbaycanın adı üçün etmişik. Yarışmada iştirak edən ölkələr bütün bu yazıları izləyir. Əgər belə münasibət göstəriləcəksə, olmayan hadisələr işıqlandırılacaqsa, biz əvvəldən imtina edək.

Qeyd edək ki, müsabiqədə Türkiyə, Albaniya, Tunis, Kipr, İspaniya, Gürcüstan, Ukrayna, Rusiya, Özbəkistan, İsrail, Qırğızıstan, Qazaxıstan da daxil olmaqla, ümumilikdə 24 ölkə iştirak edəcək. Final gecəsi sentyabr ayında keçiriləcək.

Jalə