Londonda “Niku Patron” kimi tanınan “qanuni oğru” İon Quşan saxlanılıb. Məlumatı Baş Polis Müfəttişliyi təsdiqləyib.
Lent.az xəbər verir ki, Britaniya KİV-lərinin məlumatına görə, 54 yaşlı Moldova əsilli şəxs Londonun şərqində Cinayətkarlıqla Mübarizə Agentliyi əməkdaşları tərəfindən tutulub. Xüsusi təyinatlılar Quşanın ailəsi ilə birlikdə olduğu “Mercedes S-Class” markalı avtomobili mühasirəyə alıblar.
Baş Polis Müfəttişliyi bildirib ki, saxlanılma Avropa həbs orderi əsasında həyata keçirilib. Daha əvvəl Quşan Fransada qiyabi olaraq mütəşəkkil cinayətkarlıq və qaçaqmalçılığa görə 10 il həbs və 300 min avro cərimə cəzasına məhkum edilib.
Beynəlxalq KİV-lərin yazdığına görə, polis əməkdaşları “Patron”u dəbdəbəli limuzindən güc tətbiq edərək çıxarıblar. Saxlanılma kriminal avtoritetin uzunmüddətli axtarışını başa çatdıran xüsusi əməliyyatın nəticəsi olub. Bu illər ərzində Quşan ailəsi ilə birlikdə Böyük Britaniyanın müxtəlif bölgələrində gizlənib.
Hazırda İon Quşan Böyük Britaniyada həbsdə saxlanılır. O, Fransaya ekstradisiyası proseduruna etiraz edir. Fransada Quşan ötən ilin mayında silahlı soyğunçuluq, zorakılıqla hədə-qorxu, reket, qaçaqmalçılıq, çirkli pulların yuyulması və mütəşəkkil cinayətkar dəstədə iştirak ittihamları ilə qiyabi olaraq 10 il azadlıqdan məhrum edilib.
İon Quşan 4 may 2023-cü ildə Moldova Respublikasında da axtarışa verilib. O, 5 milyon ley məbləğində şantajda ittiham olunur: həmin iş üzrə keçmiş idmançı İon Şoltoyanu saxlanılıb.
2012-ci ildə “Patron” rumıniyalı biznesmen Puyu Mironeskunun öldürülməsi üçün killer Vitali Prokanın tutulmasında vasitəçilik etməkdə ittiham olunub. Qalmaqala baxmayaraq, o zaman cəzadan yayınmağa nail olub. Daha sonra Rumıniya hüquq-mühafizə orqanlarının məlumatına görə, Quşan iki qanunsuz siqaret istehsalı fabriki təşkil edib və bu müəssisələr xüsusi xidmət orqanları tərəfindən ləğv edilib. 2016-cı ildə Quşan 14 il həbsə məhkum edilsə də, hökm sonradan yenidən baxılaraq dəyişdirilib.
2023-cü ildə Fransa, Rumıniya və Moldova hakimiyyət orqanları Moldova vətəndaşlarından ibarət, oğurluq və siqaret qaçaqmalçılığında şübhəli bilinən qruplaşma ilə bağlı 50-dən çox ünvanda axtarış aparıblar. İstintaqın versiyasına görə, qruplaşmaya İon Quşan rəhbərlik edib və Fransa hakimiyyəti onun barəsində Avropa həbs orderi verib.
Quşan Rumıniyada saxlanılsa da, məhkəmə həmin vaxt Rumıniya məhkəmələrində baxılan cinayət işləri başa çatana qədər onun Fransaya verilməsini təxirə salıb. Daha sonra telefon dinləmələrinin konstitusiyaya zidd sayılması və əsas sübutların ləğvi səbəbilə o, tam bəraət alıb.
Bunun ardınca Avropa həbs orderi yenidən aktivləşdirilsə də, polis Quşanı Rumıniyada tapa bilməyib.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
