Bayram Məmmədovun qardaşı həbsdə öldü: anasını öldürmüşdü - YENİLƏNİB

Elvin Məmmədovun ölüm səbəbi məlum olub.

Lent.az Sabunçu Tibb Mərkəzinə istinadən xəbər verir ki, 21.08.2026-cı il tarixində saat 14:40 radələrində 1992-ci il təvəllüdlü şəxs (kişi) Ədliyyə Nazirliyinin Penitensiar xidmətinin əməkdaşlarının müşayiəti ilə Sabunçu Tibb Mərkəzinə hospitalizasiya olunub:

“Pasiyentə beyin-qan dövranının işemik insult tipli pozulması diaqnozu təyin edilib. Aparılan reanimasiya tədbirlərinə baxmayaraq, 23.08.2026-cı il tarixində saat 16:00 radələrində onun bioloji ölüm faktı qeydə alınıb”.

***

saat 10:10

Avqustun 1-də anasını qətlə yetirməkdə şübhəli bilinərək həbs edilən Elvin Məmmədov vəfat edib.

Lent.az "Nocomment.az"a istinadən xəbər verir ki, o, gecə saatlarında təcridxanadan Sabunçu Tibb Mərkəzinə gətirilib və orada ölüb. Onun vəfatının səbəbi hələlik bilinmir.

Qeyd edək ki, Elvin Məmmədov “NİDA” Vətəndaş Hərəkatının üzvü olan, 2021-ci ildə İstanbulda vəfat edən Bayram Məmmədovun qardaşıdır.

O, bu ayın əvvəli anasını qətlə yetirməkdə şübhəli bilinərək həbs edilmişdi.

***

1 avqust, saat 11:03

Bakının Sabunçu qəsəbəsində 54 yaşlı Sevinc Məmmədova münaqişə zəminində bıçaqla qətlə yetirilib.

Lent.az xəbər verir ki, hadisə bu gün səhər saatlarında qəsəbədəki evlərin birində qeydə alınıb.

Cinayəti törətməkdə şübhəli bilinən oğlu, 34 yaşlı Elvin Məmmədov polis əməkdaşları tərəfindən saxlanılaraq istintaqa təhvil verilib.

Faktla bağlı araşdırma aparılır.

Qeyd edək ki, qətl “NIDA” Vətəndaş Hərəkatının üzvü olan, 2021-ci ildə İstanbulda vəfat edən Bayram Məmmədovun ailəsində baş verib. Belə ki, qətlə yetirilən Sevinc Məmmədova Bayram Məmmədovun anası, Elvin isə qardaşıdır.