Yeyinti məhsullarına nəzarət laboratoriyası işə düşdü

İqtisadi İnkişaf Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidmətində yeyinti məhsullarının keyfiyyət və təhlükəsizliyinə nəzarət üzrə yeni laboratoriya istifadəyə verilib.

Nazirliyin mətbuat xidmətindən Lent.az-a bildiriblər ki, laboratoriyada ət və ət məhsulları, balıq, süd və süd məhsulları, konservləşdirilmiş məhsullar, meyvə-tərəvəz, bitki və heyvan mənşəli yağlar və digər yeyinti məsulları fiziki-kimyəvi, bioloji və toksikoloji göstəriciləri təyin ediləcək. Artıq bunun üçün laboratoriyada hər cür şərait yaradılıb. Belə ki, burada dünyanın tanınmış "Varian", "Simens", "Labart", "Orka Food", "Esco Biotech", "Şmartze" kimi şirkətlərinin istehsalı olan ən müasir cihaz və avadanlıqlar quraşdırılıb. Həmin avadanlıqlar Standartlaşdırma, Metrologiya və Patent üzrə Dövlət Komitəsi tərəfindən akkreditasiyadan keçirilib.

Hazırda laboratoriyanın beynəlxalq İSO 17025 standartı üzrə akkreditasiyadan keçirilməsi istiqamətində tədbirlər görülür.

Elxan SALAHOV