Vergi ilə bağlı bir neçə şirkət haqqında cinayət işinə xitam verildi

Vergilər Nazirliyi yanında Vergi Cinayətlərinin İbtidai Araşdırılması Departamentində görülmüş tədbirlər nəticəsində bir sıra fiziki və hüquqi şəxslər tərəfindən dövlət büdcəsindən yayındırılmış vergilərin ödənilməsi təmin olunub. Lent.az-ın Vergilər Nazirliyinin rəsmi saytına istinadən verdiyi məlumata görə, təkcə cari ilin noyabr ayının 20 günü ərzində dövlət büdcəsinə vurulmuş ziyanın ödənilməsi təmin olunduğundan 4 cinayət işi üzrə icraata xitam verilib.

İstintaq zamanı toplanmış materiallarla müəyyən edilib ki, “Texservis-T” və “Qlobal Təminat” məhdud məsuliyyətli cəmiyyətləri, “Samir-B” kiçik müəssisəsi və fiziki şəxs Əhmədov Abid Əziz oğlunun sahibkarlıq fəaliyyəti nəticəsində yaranmış xeyli miqdarda vergilər dövlət büdcəsinə vaxtında ödənilməyib. Göstərilən faktlar sübuta yetirildiyi üçün Azərbaycan Respublikası Cinayət Məcəlləsinin 213.1 maddəsi ilə müvafiq cinayət işləri başlanıb.

İstintaq prosesində sahibkarlara qanunvericiliyin tələbləri, eləcə də dövlətə vurulan ziyan ödənildikdə barələrində cinayət təqibinə xitam veriləcəyi izah olunub. Nəticədə “Texservis-T” və “Qlobal Təminat” MMC-lərin, “Samir-B” kiçik müəssisəsinin rəhbərləri, həmçinin, fiziki şəxs Əhmədov Abid Əziz oğlu fəaliyyətləri nəticəsində yaranmış xeyli miqdarda vergiləri dövlət büdcəsinə köçürmə yolu ilə ödəyiblər. Bu faktlarla bağlı başlanmış cinayət işlərinin icraatına xitam verilib.