“Unibank” Milli Kitab Mükafatına sponsorluq edəcək

Bankın marketinq şöbəsindən Lent.az-a bildiriblər ki, bu qurum hər il ən yaxşı ədəbiyyat əsərlərinin müəlliflərinin təltif edildiyi layihənin sponsoru olaraq, müasir Azərbaycan ədəbiyyatının inkişafına əhəmiyyətli pay verə biləcək bütün yazıçılara dəstək vermək niyyətindədir. Belə ki, MKM-ın sponsorları tərəfindən ayrılan vəsait ən yaxşı müəlliflərin dəstəklənməsinə və onların əsərlərinin dərc edilməsinə xərclənəcək.

“Əminəm ki, uğurlu biznes təkcə gəlirin əldə edilməsi deyil, həm də vətəndaşlar və bütövlükdə cəmiyyət qarşısında məsuliyyətdir. Məhz buna görə biz, korporativ təsisatlar arasında ilk cərgədə Milli Kitab Mükafatı layihəsini dəstəklədik” - deyə, “Unibank” ASC İdarə Heyətinin sədri Faiq Hüseynov bildirib.

MKM-nın təsisçisi Nigar Köçərli isə “Unibank” kimi iri bankların milli ədəbiyyatın dəstəklənməsini və bu layihədə sponsorluğunun xüsusi əhəmiyyət daşıdığını söyləyib. Onun fikrincə, “Unibank”ın və layihənin digər sponsorlarının maliyyə köməyi ilə, yazıçıların dəstəklənməsi ənənəsinin davam etdirilməsi Azərbaycan ədəbiyyatının inkişafı üçün əhəmiyyətli addım olacaqdır: “Digər ölkələrin təcrübəsi onu göstərir ki, bu cür mükafatlar məhz milli korporasiyalar tərəfindən dəstəklənir, və çox yaxşı bir haldır ki, belə bir təcrübə bizdə də formalaşmaqdadır”.

Nigar Köçərli deyib ki, ədəbiyyat əsərlərinin Milli Kitab Mükafatı müsabiqəsinə təqdim edilməsi prosesi noyabrın 25-də start götürür və 2011-ci ilin yanvarın 11-dək davam edəcək. Onun sözlərinə görə, təqdim olunan əsərlərin qiymətləndirilməsi ilkin mərhələdə peşəkar ekspertlər tərəfindən aparılacaq. Nəticədə namizəd əsərlərin əvvəl “uzun siyahısı”, sonra isə “qısa siyahısı” hazırlanacaq. Sonrakı mərhələdə seçilən əsərlər Rüstəm İbrahimbəyov, Elçin Şıxlı, Çingiz Abdullayev və xalq arasında digər nüfuz qazanan yazıçı və publisistlərdən ibarət Münsiflər Heyətinin diqqətinə veriləcək.

Qaliblərin elan edilməsi və Milli Kitab Mükafatla təltif olunma mərasimi 2011-ci ilin mayın 31-də keçiriləcək.