Qida istehsalı 0,6 faiz bahalaşıb

Dövlət Statistika Komitəsi 2010-cu ilin oktyabr ayında sənaye məhsullarının istehsalçı qiymətlərinin dəyişməsi tendensiyasını açıqlayıb.

Komitədən Lent.az-a bildiriblər ki, oktyabr ayında sənaye məhsullarının istehsalçı qiymətləri əvvəlki aya nisbətən 0,1 faiz ucuzlaşıb. Ay ərzində mədənçıxarma sənayesində xam neft və təbii qaz hasilatı üzrə qiymətlər 0,3 faiz azalıb, mədənçıxarma sənayesinin digər sahələri üzrə isə 3,9 faiz artıb.

Emal sənayesində istehsalçı qiymətləri kağız və karton istehsalı üzrə 7,6 faiz, maşın və avadanlıqlardan başqa hazır metal məmulatların istehsalı üzrə 2,3 faiz, koks və təmizlənmiş neft məhsullarının istehsalı üzrə 0,8 faiz, rezin və plastmas məmulatların istehsalı üzrə 0,7 faiz, qida məhsullarının istehsalı üzrə 0,6 faiz, tütün məmulatlarının istehsalı üzrə 0,3 faiz, içkilərin istehsalı üzrə 0,1 faiz bahalaşıb. Əczaçılıq məhsullarının istehsalı üzrə 2,1 faiz, toxuculuq sənayesi üzrə 1,6 faiz, geyim istehsalı üzrə 0,9 faiz, metallurgiya sənayesi üzrə 0,7 faiz, digər qeyri-metal mineral məhsulların istehsalı üzrə isə 0,3 faiz ucuzlaşıb.

Elxan SALAHOV