10 aylıq inflyasiya 6,23 faiz olub

İqtisadi Tədqiqatlar Mərkəzi (İTM) “Alternativ inflyasiya səviyyəsinin hesablanması və modellərin işlənilməsi” layihəsi çərçivəsində 2010-cu ilin oktyabr ayı ərzində apardığı qiymətlərin statistik müşahidəsinin nəticələrini təqdim edib.

İTM-in ictimaiyyətlə əlaqələr departamentindən Lent.az-a bildiriblər ki, Azərbaycanın 22 regionunda aparılmış statistik müşahidələrin nəticəsi ay ərzində istehlak qiymətlərinin 1,21 faiz artığını göstərib. Bu zaman Bakıda qiymətlər 1,17 faiz, regionlarda isə 1,25 faiz artıb. Bu ilin 10 ayında ölkədə 6,23 faiz inflyasiya baş verib.

İTM-in hesablamalarına görə, ötən ilin oktyabrına nisbətən ölkədə istehlak qiymətləri indeksi 7,59 faiz artıb. Oktyabr ayı ərzində ən çox bahalaşma ərzaq məhsulları üzrə baş soğan (34,66 faiz), yer xiyarı (21, 40 faiz), qarabaşaq yarması(16,50 faiz), toyuq yumurtası (12,57 faiz), kütüm, sazan, xəşəm (3,32 faiz), ən çox ucuzlaşma yenə də ərzaq məhsullarından xurma (22, 08 faiz), alma (13,89 faiz), limon (7,33 faiz), göyərti (7,16 faiz), diş yumaq üçün pastada (1,97 faiz) qeydə alınıb. Xatırladaq ki, Dövlət Statistika Komitəsi oktyabr ayında Azərbaycanda istehlak qiymətləri indeksinin 0,9 faiz artdığını elan edib.

İTM ekspertləri həmçinin Azərbaycanın 22 regionunda 2010-cu ilin oktyabr ayı ərzində aparılan qiymətlərin statistik müşahidəsinin nəticələri və Nazirlər Kabinetinin 30 aprel 2009-cu il tarixli qərarı ilə təsdiq olunmuş normativlər əsasında oktyabr ayı üzrə minimum istehlak səbətinin dəyərini hesablayıblar. Həmin hesablamalara əsasən, ötən ay Azərbaycanda yaşayış minimumu əmək qabiliyyətli əhali üçün adambaşına 145,4 manat, pensiyaçılar üçün 135,22 manat, 0-14 yaşlı uşaqlar üçünsə 185,83 manat təşkil edib. Oktyabr ayında əmək qabiliyyətli əhali adambaşına ərzağa minimum 87,87 manat, pensiyaçılar 83,07 manat, 0-14 yaşlı uşaqların valideynləri isə 106,7 manat xərcləməli olub. Ay ərzində bazardakı qiymətlərlə əhalinin qeyri-ərzaq məhsullarına çəkdiyi minimum xərcləri işləyən əhali üçün 32,43 manat, pensiyaçılar üçün 29,89 manat, 0-14 yaşlı uşaqlar üçün 61,66 manat, xidmət xərcləri isə müvafiq olaraq 22,26 manat, 22,83 manat və 17,47 manat təşkil edib.

Xatırladaq ki, “Azərbaycan Respublikasında 2010-cu il üçün yaşayış minimumu haqqında” Qanunun əsasında ölkədə 2010-cu il üçün yaşayış minimumu 87 manat, əmək qabiliyyətli əhali üçün 96 manat, pensiyaçılar üçün 68 manat, uşaqlar üçün 72 manat məbləğində müəyyən edilib.

Elxan SALAHOV