Çörək istehsalı müəssisinin yaradılmasına dair 17 təklif

İqtisadi İnkişaf Nazirliyinin Sahibkarlığa Kömək Milli Fondunda müasir standartlara cavab verən çörək istehsalı müəssisəsinin yaradılması və ya müasir texnologiyaların tətbiqi ilə yenidən qurulması üzrə investisiya layihələrinin maliyyələşdirilməsinə dair sahibkarlıq subyektlərinin təqdim etdiyi təkliflərə baxılıb. Nazirliyin mətbuat xidmətindən Lent.az-a bildiriblər ki, fonda daxil olmuş 17 təklifdən 8-i Bakı, 4-ü Aran, 3-ü Quba-Xaçmaz, 1-i Abşeron, 1-i isə Gəncə-Qazax iqtisadi rayonlarındandır. Layihələrin ümumi dəyəri 27,3 milyon, güzəştli kreditə olan tələbat isə 17,6 milyon manatdır. Yaxın günlərdə daxil olan layihələrin monitorinqi keçiriləcək və bu layihələrin nə qədər tələblərə cavab verməsi araşdırılandan sonra onlardan hansılarının maliyyələşdiriləcəyi müəyyənləşəcək.

Bu gün həmçinin intensiv bağçılığın (alma, armud, üzüm, ərik, şaftalı, nar, xirnik, gilas, albalı, gavalı, göyəm, alça, zeytun, zoğal, eləcə də subtropik və sitrus meyvə bağlarının salınması) və tingliliyin inkişafı üzrə investisiya layihələrinin maliyyələşdirilməsi məqsədilə sahibkarlıq subyektlərindən təkliflərinin qəbulu üçün verilmiş elan üzrə sahibkarlıq subyektlərinin təqdim etdikləri 12 təklif zərfinə də baxılıb. Güzəştli qaydada maliyyələşdiriləcək investisiya layihələrinin adları elan edilib.

Elxan SALAHOV