Ziyad Səmədzadə: “Neft Fondunun vəsaitlərinin bir hissəsini xərcləməliyik”

2011-ci ilin büdcə layihəsi Milli Məclisin plenar iclasında müzakirəyə çıxarılıb. Lent.az-ın məlumatına görə, hazırda layihə barədə parlamentin iqtisadi siyasət komissiyasının sədri Ziyad Səmədzadə çıxış edir.

Z.Səmədzadə bir məqamı xüsusi vurğulayıb. O bildirib ki, Azərbaycan Respublikası Dövlət Neft Fondunun (ARDNF) vəsaitlərinin bir hissəsi mütləq istifadə edilməlidir. Əks halda, vacib sosial layihələr, o cümlədən, qaçqın və məcburi köçkünlərin mənzil şəraitinin yaxşılaşdırılması kimi əhəmiyyətli layihələri reallaşdırmaq mümkün deyil: “Bəzi millət vəkillərinin ARDNF-in vəsaitlərinin xərclənməsi ilə bağlı narahatlığını başa düşmək olar. Onlar da Azərbaycanın gələcək inkişafı nöqteyi-nəzərindən Neft Fondunun vəsaitlərinin xərclənməsindən narahatdırlar. Lakin bu narahatlığı bir qədər real başa düşmək lazımdır. Real vəziyyəti nəzərə almaq lazımdır ki, həmin vəsaitlərin bir hissəsini xərcləməsək, Azərbaycanın digər sahələrini inkişaf etdirə bilməyəcəyik”.

Z.Səmədzadə həmçinin bildirib ki, artıq qeyri-neft sektorunda da son illər iqtisadi artım müşahidə olunur. Onun sözlərinə görə, Azərbaycan borc alan ölkədən borc verən ölkəyə çevrilib və bu, ölkəmizdə iqtisadi inkişafın nəticəsidir.

Qeyd edək ki, Milli Məclisdə 2011-ci ilin büdcə layihəsinin müzakirəsi gün ərzində davam etdiriləcək.

Elxan SALAHOV