Azərbaycanda mövsümi gömrük rüsumları tətbiq ediləcək

Bu barədə 2011-ci ilin dövlət büdcəsi layihəsi zərfində məlumat verilir. Bu məqsədlə ölkədə həmçinin mövsümi rüsumların tətbiqi də nəzərdə tutulub.

Kənd Təsərrüfatı Nazirliyi iqtisadiyyat və maliyyə şöbəsinin müdiri Rafiq Məcidov «APA-ECONOMICS»ə bildirib ki, gömrük idxal tariflərinin dəyişməsi taxıl, un və düyü məhsullarına aid olacaq. Mövsümi rüsumların tətbiqi isə əsasən kartof, tərəvəz və taxıl bitkilərinin toxumlarını əhatə edəcək. «Söhbət yaz-payız əkinləri dövründə bu toxumların ölkəyə gətirilməsi üçün rüsumların ləğv edilməsindən gedir», - deyə şöbə müdiri bildirib.

Bununla yanaşı, kənd təsərrüfatının maddi-texniki təminatını yaxşılaşdırmaq üçün lizinq qurumlarının fəaliyyətinin genişləndirilməsi və bu sahədə yeni təşkilatların yaradılması dəstəklənəcək.

Paralel olaraq aqrar sahədə sığortanın stimullaşdırılması üçün müvafiq qanunvericiliyin təkmilləşdirilməsi, eləcə də sahibkarların maliyyə resurslarına olan ehtiyaclarının ödənilməsi üçün kənd yerlərində maliyyə kredit institutlarının yaradılması və inkişafı nəzərdə tutulur.