“Gənclik”dəki tunellər ilin axırına hazır olacaq

Metronun , “Gənclik” stansiyası yaxınlığında, Fətəli Xan Xoyski və Koroğlu Rəhimov küçələrinin kəsişməsində inşa olunan tunelin tikintisi yaxın 2 ay müddətinə başa çatacaq. Lakin tunelin istifadəyə verilməsi bir qədər uzun çəkəcək.

Nəqliyyat Nazirliyindən Lent.az-a bildiriblər ki, artıq sahənin öyrənilməsi və kommunikasiyaların dəyişdirilməsi işləri başa çatıb. Hazırda dairə ətrafındakı binalarda və piyada yollarında da yenidənqurma işləri aparılır. Layihəyə əsasən, metronun “Gənclik” stansiyasının Atatürk prospektinə baxan girişin yeri “Qələbə meydanı”nın mərkəzinə doğru dəyişəcək. Yerdəyişmənin məqsədi yenidənqurma işlərindən sonra piyadaların sərbəst hərəkətini təmin etməkdir.

Nazirlikdə bildirirlər ki, “Qələbə meydanı”nda reallaşdırılan bu layihə ərazidə ümumilikdə 5 tunelin inşasını və əlaqədar yolların genişləndirilməsini nəzərdə tutur. Metronun 4 çıxışından əlavə Tofiq Bəhramov adına Respublika Stadionu istiqamətində bir yeni çıxış da açılacaq, ətrafdakı binaların xarici görünüşü dəyişdiriləcək.

Yeni yol qovşağının tam şəkildə gələn ilin yanvarında istifadəyə verilməsi planlaşdırılır.

Elxan SALAHOV