2700 saxta DVD satışdan çıxarılıb

İqtisadi İnkişaf Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidmətinə daxil olmuş şikayət əsasında Bakının Səbail və rayonlarında bəzi audiovizual sənaye məhsullarının satışının qanunauyğunluğu yoxlanılıb.

İqtisadi İnkişaf Nazirliyinin mətbuat xidmətindən Lent.az-a bildiriblər ki, yoxlamalar Nizami küçəsi - 48 ünvanda Anar Qardaşova, Nizami küçəsi - 81 ünvanda Sevinc Feyzullayevaya məxsus mağazalarda, həmçinin Xəqani küçəsi - 15 ünvanda “Xəqan” kiçik müəssisəsində aparılıb. Yoxlama zamanı həmin obyektlərdə xarici ölkələrdə istehsal olunmuş və yalnız bu ölkələrdə istifadəsi nəzərdə tutulmuş DVD-lərin piratlıq yolu ilə çoxaldılmaqla satıldığı aşkar edilib. Bu obyektlərdən 2,7 min ədəd pirat DVD-lər satışdan çıxarılaraq məsul saxlanmaya götürülüb.

Pirat DVD-lər satmaqla istehlakçıların çaşdırılmasına və haqsız rəqabətə yol verdiklərinə görə qeyd olunan təsərrüfat subyektləri barəsində antiinhisar qanunvericiliyinin tələblərinin pozulması əlamətləri üzrə iş qaldırılıb.