İqtisadiyyatımıza ən çox sərmayə qoyan Böyük Britaniyadır

“APA-ECONOMICS”in Dövlət Statistika Komitəsinə istinadən verdiyi məlumata görə, hesabat dövründə Böyük Britaniyanın Azərbaycana yatırdığı investisiyaların həcmi 505 038,8 min manat təşkil edib ki, ötən ilin eyni dövrü ilə müqayisədə Britaniya investisiyalarının həcmi 30,8% artıb.

Siyahıda ikinci yerdə ABŞ qərarlaşıb. Belə ki, yanvar-avqust aylarında ABŞ-ın Azərbaycanın əsas kapitalına yatırdığı investisiyaların həcmi 2009-cu ilin analoji dövrü ilə müqayisədə 71,3% artaraq 223 960,6 min manata çatıb.

Siyahıda üçüncü yerdə ötən ilki kimi Yaponiya, daha sonra Norveç və Türkiyə qərarlaşıb. Hesabat dövründə Yaponiya investorları tərəfindən Azərbaycanın əsas kapitalına 117 157,8 min manat (+71,2%), Norveç investorları tərəfindən 72 643,6 min manat (+70,5%), Türkiyə investorları tərəfindən isə 63 801,3 min manat (+88,5%) sərmayə yatırılıb.

Siyahının ilk onluğunu 21 654,6 min manat investisiya yönəltmiş Cənubi Koreya, 20 448,5 min manatla Fransa, 5 068,0 min manatla Çexiya, 3 359,3 min manatla Səudiyyə Ərəbistanı və 1 937,2 min manatla Rusiya tamamlayır.

Qeyd edək ki, hesabat dövründə Azərbaycanın əsas kapitalına yönəldilmiş xarici investisiyaların ümumi həcmi 1 103,1 mln. manat təşkil edib. Bu da ötən ilin analoji dövrü ilə müqayisədə 31,5% çoxdur.

Azərbaycanın əsas kapitalına vəsait yatırmış investorların ilk onluğu siyahısı

№	Ölkə	2010-cu ilin yanvar-avqust aylarında (min manat)	Ümumi həcmdə xüsusi çəkisi (%)
1.	Böyük Britaniya	505 038,8	45,8
2.	ABŞ	223 960,6	20,3
3.	Yaponiya	117 157,8	10,6
4.	Norveç	72 643,6	6,6
5.	Türkiyə	63 801,3	5,8
6.	Koreya Respublikası	21 654,6	2,0
7.	Fransa	20 448,5	1,8
8.	Çexiya	5 068,0	0,5
9.	Səudiyyə Ərəbistanı	3 359,3	0,3
10.	Rusiya	1 937,2	0,2