Bakı-Tbilisi-Qars layihəsinin tikintisi sürətləndirilir

“Azərbaycan Dəmir Yolları” Qapalı Səhmdar Cəmiyyətinin sədr müavini Qurban Nəzirovun rəhbərlik etdiyi nümayəndə heyəti Bakı-Tbilisi-Qars dəmir yolu layihəsinin Gürcüstan hissəsinin tikintisindəki vəziyyətlə yaxından tanış olmaq üçün bu ölkəyə səfər edib. Səhmdar Cəmiyyətin mətbuat xidmətinin rəhbəri Nadir Əzməmmədov Lent.az-a bildirib ki, nümayəndə heyəti artıq Gürcüstandadır.

Onun sözlərinə görə, Qurban Nəzirov telefonla məlumat verərərək, Bakı-Tbilisi-Qars dəmir yolunun Gürcüstan hissəsində tikinti, bərpa işlərinin xeyli sürətləndiyini bildirib. Qurban Nəzirov deyib ki, səfər çərçivəsində indiyədək görülən işlər araşdırılıb. Artıq “Dəmiryolsçervis” MMC-nin kollektivinin gücü ilə Çxardzma stansiyasında istehsalat bazası yaradılıb, 2 yoldəyişən qurğu dəyişdirilib. Çxardzma-Çinçkaro mənzilində 8,5 kilometr yol və 2 körpü əsaslı təmir olunub, 1 yeni körpü inşa edilib. Bundan başqa, 5 suötürücü qurğu inşa edilib, kontakt şəbəkə xətlərinin dayaqları basdırılıb, böyük həcmdə torpaq işləri görülüb.

Xatırladaq ki, layihənin Gürcüstan hissəsinin tikintisini “Azərinşaatservis” şirkəti həyata keçirir. Layihədə “Azərbaycan Dəmir Yolları” QSC-nin “Dəmiryolsçervis” MMC-nin kollektivi podratçı təşkilat kimi layihədə iştirak edir.

“Dəmiryolsçervis” MMC-nin 46 vaqondan ibarət ilk işçi qatarı bu il mayın 5-dən, 63 vaqondan ibarət ikinci qatarı iyunun 21-dən, üçüncü işçi qatarı isə avqustun 10-dan burada fəaliyyət göstərir. “Azərbaycan Dəmir Yolları” QSC-nin 09-32 CSM markalı yol-təmir texnikası da Gürcüstana göndərilib.

Qurban Nəzirov bildirib ki, Çxardzma-Tetri-Çikaro və Axalkalaki-Kartsaxi mənzillərində ilin yekununda görüləcək işlər də müəyyənləşdirilir. Səfər başa çatandan sonra layihənin Gürcüstan hissəsinin tikintisi ilə bağlı daha geniş məlumatların veriləcəyi gözlənilir.

Elxan SALAHOV