“Təmiz Şəhər” reyd keçirir
07 sentyabr 2010 11:21 (UTC +04:00)

“Təmiz Şəhər” reyd keçirir

Ekologiya və Təbii Sərvətlər Nazirliyinin, Bakı Şəhər İcra Hakimiyyətinin və “Təmiz Şəhər” ASC-nin birgə yaratdığı İşçi Qrup paytaxtda qeyri-qanuni tullantıların zərərsizləşdirilməsi məqsədilə reydlər keçirir.

“Təmiz Şəhər” ASC-nin mətbuat xidmətindən Lent.az-a bildiriblər ki, reydlər zamanı Suraxanı rayonunun Zığ və Dədə Qorqud qəsəbəsində, Binəqədi rayonunun “Baksol” adlanan sahəsində, Xocahəsən gölü sahilində, Xətai rayonunda kərpic zavodunun ətrafında və digər çoxsaylı qeyri-qanuni tullantı sahələrində müxtəlif qanun pozuntuları aşkarlanıb. Belə ki, bərk məişət tullantılarının daşınması ilə məşğul olan qurumlar tullantıları Balaxanı poliqonuna daşımalı olduğu halda, bəzi sürücülərin tullantıları son məntəqəyə qədər daşımadığı, bununla da qanun pozuntusuna yol verildiyi müəyyən edilib.

Qeyri-qanuni tullantı sahələrinə tullantı daşıyan maşın sahibləri İşçi Qrup tərəfindən reydlərin keçirilməsi barədə məlumatlı olduğu üçün tullantıları qeyri-qanuni sahələrə axşam və gecə saatlarında daşımağa üstünlük verirlər. Aşkar edilmiş faktlarla bağlı müvafiq müəssisə və mənzil-kommunal təsərrüfat birliklərinə məlumat göndərilmiş, onlardan belə halların qarşısının alınması barədə tədbir görmələri tələb olunub.

Hazırda belə halların aradan qaldırılması məqsədilə müəyyən tədbirlər hazırlanır.

Elxan SALAHOV
# 557

Oxşar yazılar