Topaz Premyer Liqası: 5 qırmızı, 15 qol – NƏTİCƏLƏR - TURNİR CƏDVƏLİ

Futbol üzrə Topaz Premyer Liqasında XXVII tura yekun vurulub. Lent.az-ın məlumatına görə, lider “Neftçi” növbəti qələbəsini “Qəbələ” üzərində qazanıb.

Flaqman hesabda geri düşməsinə baxmayaraq, matçı öz xeyrinə dəyişməyi bacarıb. Oyun gərgin mübarizə şəraitində keçib. Baş hakim Əliyar Ağayev “Qəbələ”dən Aleksandr Çertoqanov, “Neftçi”dən isə Flavinyoya qırmızı vərəqə göstərərək, hər iki komandanı azlıqda qoyub.

“İnter” “kiçik qardaş”ı “Simurq”u darmadağın edib. Zaqatala təmsilçisi paytaxt komandasına müqavimətsiz təslim olub. Prosesi ilk yarıda qonaqların azlıqda qalması daha da sürətləndirib. Bundan sonra daha 4 qol vuran “İnter” böyük hesabla qalib gəlib – 5:0.

Lakin paytaxt təmsilçisi 2-ci pilləyə yüksələ bilməyib. Buna “Qarabağ”ın səfərdə “Bakı”ya minimal hesabla qalib gəlməsi səbəb olub. Yeganə qol baş hakim Ramil Diniyevin şübhəli penalti qərarından sonra Riçard Almeyda vurub.

“İlk 6-lıq”dakı bu nəticələrdən sonra “Bakı” və “Qəbələ”nin çempionatı medalsız başa vuracaqları dəqiqləşib. İndi yalnız “Neftçi”, “Qarabağ”, “İnter” və “Simurq” ən azı bürünc medal uğrunda yarışa bilər.

Hesabat turunda futbolçulara 5 qırmızı vərəqə göstərilib. 2 matçda hərəyə 2, 1 görüşdə isə 1 oyunçu meydandan qovulub. Qapılara isə üst-üstə 15 qol vurulub.

19 aprel (cümə)

“Kəpəz” (Gəncə) – “Turan” (Tovuz) – 0:1

Qol: Salif Ballo, 51

AZAL (Bakı) – “Rəvan” (Bakı) – 3:2

Qollar: Junior Nildo, 5. Con Oluremi, 58; 84 - Ramazan Abbasov, 68. Mindauqas Kalonas, 90+3

20 aprel (şənbə)

“İnter” (Bakı) – “Simurq” (Zaqatala) – 5:0

Qollar: Yuri Fomenko, 4; 44. Daniel Genov, 37; 64. Ramil Mansurov, 59

Qırmızı vərəqə: Mario Bojiç, 30 (“Simurq”)

21 aprel (bazar)

“Bakı” – “Qarabağ” (Ağdam) – 0:1

Qol: Riçard Almeyda, 87 – penalti ilə

“Neftçi” (Bakı) – “Qəbələ” – 2:1

Qollar: Denis Silva Kruz, 53. Nikolas Kanales, 69 - Rodriges Assis, 15

Qırmızı vərəqələr: Flavio Aleks Valensio, 66 - Aleksandr Çertoqanov, 65

“Xəzər Lənkəran” – “Sumqayıt” – 0:0

Qırmızı vərəqələr: Dimitrios Sialmas, 90+2 - Taner Taktak, 86

Turnir cədvəli:

İlk “6-lıq”

N	Komandalar	O	Q	H	M	T	X
1	Neftçi	27	17	3	7	53-28	54
2.	Qarabağ	27	14	9	4	37-23	51
3.	İnter	27	14	8	5	35-18	50
4.	Simurq	27	10	10	7	27-23	40
5.	Bakı	27	7	14	6	24-20	35
6.	Qəbələ	27	9	7	11	30-34	34