Mustafa Dənizli “Qalatasaray”a gedir?

“Xəzər Lənkəran” futbol klubunun baş məşqçisi Mustafa Dənizli mövsümün sonunda “Qalatasaray”a keçə bilər. Apasport.az saytının məlumatına görə, belə bir iddia ilə Türkiyə mətbuatı çıxış edib.

Xəbərdə bildirilib ki, çox ağır günlər keçirən, Çempionlar Liqasını tərk edən “Qalatasaray”ın ölkə çempionatının son turunda öz meydanında “Kasımpaşa”ya biabırçı hesabla məğlub olması hətta,klubun prezidenti Ünal Aysalın da səbir kasasını daşdırıb. Aysal baş məşqçi Roberto Mançini ilə yollarının ayrılmasının vacibliyini dərk edib və yeni məşqçi axtarışlarına başlayıb.

Türkiyə KİV-nin iddiasına görə, hazırda bu posta 2 nəfərin namizədliyi nəzərdən keçirilir. Onlardan biri adı artıq xeyli müddətdir “Qalatasaray”la birgə çəkilən Mirça Luçeskudur. Luçeskunun Ukraynadakı gərginliklə bağlı mövsümün sonunda Donetsk “Şaxtyor”undan ayrılacağı iddia edilir.

İkinci namizədin isə “Xəzər Lənkəran”ın hazırkı baş məşqçisi Mustafa Dənizli olduğu iddia olunur. Vaxtilə “Qalatasaray”la birgə böyük uğurlara imza atan Dənizliyə bir müddət öncə komandanın idman direktoru olmaq da təklif edilib. Dənizli bu təklifdən imtinasını belə əsaslandırmışdı: “Təklif çox cəlbedici idi. Amma qərar verməmişdən əvvəl ölçüb-biçməm lazım idi . “Qalatasaray”ın isə gözləməyə vaxtı yox idi…”