Konfederasiyalar Kubokunun ən yaxşı futbolçularından biri Premyer Liqada

Konfederasiyalar Kubokunun qalibi Braziliya milli komandasının futbolçusu Paulinyo karyerasını İngiltərə “Tottenhem”ində davam etdirəcək. Lent.az-ın məlumatına görə, 24 yaşlı yarımmüdafiəçidən ötrü Braziliya “Korintians”ına 17 milyon funt sterlinq (20 milyon avrodan çox) ödəniləcək.

O, yeni klubuna bir neçə gündən sonra qoşulacaq. “Sambaçı”ya ən yaxşı 3-cü futbolçu sayıldığı Konfederasiyalar Kubokundan sonra istirahət verilib. O, Braziliya millisinin qələbəsi ilə başa çatan turnirdə 5 oyuna 2 qol vurub.

Qeyd edək ki, Konfederasiyalar Kubokunda ən yaxşı futbolçu Braziliya millisinin üzvü Neymar sayılıb. İkinci yeri İspaniya yığmasından Andres İnyesta tutub. Paulinyo isə 3-cü olub. O, “Korintians”da 2010-cu ildən çıxış edirdi. Daha öncə isə Litvanın “Vilnüs” və Polşanın “Lodz” komandalarında legioner həyatı yaşayıb. Paulinyo Braziliya millisində 17 oyuna 5 qol vurub.