Faiq Qarayev: “Böyük planlarımız var”

Mayın 23-də Azərbaycanın voleybol üzrə kişilərdən ibarət milli komandası dünya Çempionatının 1-ci seçmə mərhələsində iştirak etmək üçün Xorvatiyanın paytaxtı Zaqrebə yollanacaq. Lent.az-ın məlumatına görə, səfər öncəsi komanda ilə Azərbaycan Voleybol Federasiyasının (AVF) I vitse prezidenti Faiq Qarayev və baş katib Elşən İsmayılov görüşüb.

Onlar yığma üzvlərinə mötəbər yarışda bütün federasiya adından uğurlar arzulayıblar. Qarayev bütün oyunçuların problemləri ilə maraqlanıb və yeni mövsümdən kişilər arasında da ölkə çempionatının keçiriləcəyini vurğulayıb. Federasiya rəsmiləri 24 - 26 mayda keçiriləcək seçmə mərhələdə kişilərdən ibarət yığmamızın da ölkəmizi təmsil etməsinin artıq böyük uğur olduğunu qeyd ediblər.

Qarayev deyib: “AVF-nin qarşısında böyük planlar durur. 2015-ci il Avropa Oyunlarına hazırlıq məqsədilə çimərlik voleybolu üçün yeni meydançaların, bazaların salınması, daha güclü qadınlardan və kişilərdən ibarət milli yığma komandaların olması bu planların bir hissəsidir”.

Qeyd edək ki, Azərbaycan millisinin rəqibləri Xorvatiya, Hollandiya, eləcə də Bosniya Herseqovinadır.