Əfran İsmayılov: “Gələcəkdə “Atletiko”da oynaya bilərəm”

“Bakı” klubu 2013/2014-cü il mövsümündə ilk futbolçu transferini həyata keçirib. Lent.az-ın məlumatına görə, paytaxtın eyniadlı təmsilçisi “Qarabağ”la müqaviləsini yeniləməyən Əfran İsmayılovu öz sıralarına qatıb.

25 yaşlı yarımmüdafiəçi ilə 2 illik müqavilə bağlanılıb. İsmayılov klubun “Online TV”sinə müsahibəsində bildirib ki, “Bakı”nı gözəl infrastrukturu, bazası, rəhbərliyi və gələcəyə inamla irəliləməsi ilə əlaqədar seçib. O, yeni klubunda yaxşı qarşılandığını və belə bir komandanı seçməsinə çox sevindiyi söyləyib. Yeni transfer “Bakı”nın “Atletiko”, “Portu”, “Lans” kimi klublarla əməkdaşlıq etdiyini xatırladaraq, “İnanıram ki, özümü göstərib gələcəkdə bəlkə də o klublara keçə, o komandalarda oynaya bilərəm” deyib.

Bununla belə, İsmayılov ilk növbədə, “Bakı”nı irəli aparmağın gərəkliyini vurğulayaraq, bu komanda ilə ən azı çempionluq əldə etmək üçün əlindən gələni edəcəyinə söz verib: “Doğrudan da yaradılan şərait qarşılığında bu mövsüm “Bakı”da geriləmə çox oldu. Mən də istərdim ki, bu klub Avropa kuboklarına vəsiqə qazansın və qitə miqyaslı yarışlarda iştirak edim. Amma üzücü bir şey yoxdur. “Bakı” rəhbərliyi perspektivi fikirləşir və gələcəyə böyük ümidlər bəsləyir. Ona görə də belə hallar hər bir futbol klubunda olur. İnanıram ki, növbəti mövsümdə yaxşı nəticələr göstərərək, ən azı Avropa kuboklarında qrup mərhələsinə vəsiqə qazanacağıq. Deyilənə görə, klubda çoxlu dəyişiklik ediləcək. Ən əsası, yaxşı oyunçular alaraq, iddialı heyət qurub inamlı təsir bağışlamaq və yaxşı nəticələr göstərmək lazımdır”.

Qeyd edək ki, Əfran İsmayılov 8 oktyabr 1988-ci ildə Bakı şəhərində anadan olub. O, peşəkar futbol karyerasına 2006-cı ildə “Qarabağ”da başlayıb. 2008/2009-cu il mövsümünü icarə əsasında "Turan"da keçirdikdən sonra İsmayılov yenidən Ağdam komandasına dönüb. Yarımmüdafiəçi ötən il Azərbaycan milli komandasına da dəvət alıb və 3 oyuna 1 qol vurub.