Azərbaycan fiqurlu konkisürənləri növbəti mərhələdə!

2014-cü il Soçi Qış Olimpiya Oyunlarında Azərbaycan təmsilçiləri Yuliya Zlobina və Aleksey Sitnikovdan ibarət duet mübarizəyə başlayıb. Lent.az-ın məlumatına görə, fiqurlu konkisürmənin buz üzərində rəqs növündə yer alan cütlüyümüz əvvəlcə qısa rəqs bölümündə çıxış edib.

Onlar 13-cü start nömrəsi ilə məharətlərini göstəriblər. Rəqqaslarımız elementlərin cəmində 28,79 bal, komponentlərin cəmində isə 29,36 bal yığaraq, ümumi nəticədə 58,15 balla 24 iştirakçı arasında 14-cü yeri tutublar. Bununla da Zlobina – Sitnikov dueti növbəti mərhələyə yüksələn 14 cütlük arasına düşməyi bacarıb.

Təmsilçilərimiz fevralın 17-də nümunəvi (sərbəst) çıxış üzrə də qüvvələrini sınayacaqlar. Saat 19:00-da başlanacaq mübarizə zamanı duetimiz 8-ci start nömrəsi ilə tamaşaçılar qarşısına çıxacaq. Bu, həlledici mərhələ olacaq və ilk 3 yeri tutanlar medallarına qovuşacaqlar.

Qeyd edək ki, 2014-cü il Soçi Qış Olimpiya Oyunlarında daha 2 təmsilçimiz - dağ xizəkçiləri Patrik Braxner və Qaya Bassani Antivari 18-19 fevralda mübarizəyə qoşulacaq.