AFFA Böyükağa Hacıyevi yenə cəzalandıracaq

“Neftçi” futbol komandasının baş məşqçisi Böyükağa Hacıyev yenidən cəzalanacaq. Lent.az-ın məlumatına görə, buna səbəb 55 yaşlı mütəxəssisin “Bakı” ilə Topaz Premyer Liqasında XXXII tur matçından sonra mətbuat konfransına gəlməməsidir.

Görüşün ardından təşkil olunan mükafatlandırma mərasimində Hacıyevin başı öz komandası ilə birgə çempionluq sevincinə qarışıb. O, jurnalistlərə ayaqüstü açıqlamalar versə də, mətbuat konfransına üz tutmayıb. Eyni səbəbdən, “Bakı”nın baş məşqçisi Bojidar Bandoviç də cəzalanacaq. Əsasnaməyə görə, mətbuat konfransında iştirak etməyən baş məşqçi AFFA İntizam Komitəsi tərəfindən 1000 manat cərimələnir.

Qeyd edək ki, Böyükağa Hacıyev daha öncə aprelin 6-da keçirilmiş “Neftçi”- “Qarabağ” qarşılaşmasının ardından AFFA və Peşəkar Futbol Liqası əməkdaşları haqqında qeyri-etik ifadələr işlətdiyi üçün 10 oyunluq cəzalanıb. Klub isə 20 000 manat cərimə olunub. Lakin sonradan Hacıyevin cəzası 3 oyuna endirilib və cəzanın qalan hissəsi şərtiyə çevrilib. “Bakı” ilə qarşılaşmada “Neftçi” 0:1 hesabı ilə uduzub.