"Qalatasaray"ı yarıtmayan Mançini “Tottenhem” yolunda

“Qalatasaray” rəhbərliyinin Roberto Mançini ilə yollarını ayırmayacağında israr etməsinə baxmayaraq, italiyalı mütəxəssisin komandanı tərk etmək üzrə olduğu bildirilir. Apasport.az saytının məlumatına görə, İtaliya mətbuatı Mançininin “Tottenhem”lə anlaşdığını yazıb.

İtaliyalıların iddiasına görə, baş məşqçi artıq İngiltərə klubu ilə ilkin anlaşma da imzalayıb. “Tottenhem”in mövsümün sonunda Lui van Qalla müqavilə imzalayacağı gözlənilirdi. Amma hazırda hollandiyalı mütəxəssisin adı “Mançester Yunayted”lə çəkilir. “Tottenhem” isə İngiltərə Premyer Liqası ilə yaxından tanış olan digər məşqçi axtarışına başlayıb. İlk nəzərdən keçirilən namizədlər sırasında “Mançester Siti” ilə İngiltərə çempionluğunu yaşayan Mançini olub.

İddiaya görə, Türkiyədə xoşbəxt olmadığı söylənilən Mançini mövsümün sonunda öz istəyi ilə “Qalatasaray”dan ayrılacaq. «Qlatasaray»ın baş məşqçisi postuna isə artıq ilkin razılaşma əldə edildiyi Mirça Luçesku gətiriləcək. Hələlik İstanbul klubunun rəhbərliyi bu planların hamısını gizli saxlayır.