"Neftçi" 6-cı dəfə kubokun sahibi oldu! - YENİLƏNİB

Azərbaycan kubokunun sahibi müəyyən olunub. Apasport.az saytının məlumatına görə, 2013/14 mövsümündə son titulun qalibi “Qəbələ” – “Neftçi” matçında üəyyənləşib. Tofiq Bəhramov adına Respublika stadionunda baş tutan oyunda bakılılar 6-cı dəfə ölkə kubokunu qazanıblar.

Hesabı ikinci hissədə "Neftçi" futbolçuları açıb. 52-ci dəqiqədə Samir Məsimov rəqib qapısının torunu silkələyib. Bundan sonra irəli atılan "Qəbələ" 72-ci dəqiqədə bərabərlik qolu vurub. Cavab qolunun müəllifi Marat İzmaylov olub.

Əlavə edilən vaxtda komandalardan heç biri qol vura bilməyib. Penaltilər seriyasında isə "Neftçi" daha dəqiq olub.

Bununla da, "Neftçi" tarixində 6-cı dəfə Azərbaycan kubokunun sahibi olub. Bakılılar artıq ikinci mövsüm dalbadal kuboku başları üzərinə qaldırırlar.

Finalın qalibi Avropa Liqasına II təsnifat mərhələsindən başlamaq hüququ da əldə edir. Məğlub komanda isə I təsnifatdan yarışa qatılacaq.

Bundan başqa, qalib Azərbaycan Superkubokunda oynamaq imkanı qazanıb. Bu ilin payızında keçirilməli olan qarşılaşmada "Neftçi" ölkə çempionu “Qarabağ”la üz-üzə gələcək.

“Qəbələ” – “Neftçi” - 1:1 Penaltilər: 2:3

Qollar: Marat İzmaylov, 71 - Samir Məsimov, 52

Hakimlər: Əliyar Ağayev, Namiq Hüseynov, Zeynal Zeynalov, Rauf Cabbarov

Əlavə köməkçi hakimlər: Ramil Əhmədov, Ömər Paşayev

Bakı. Tofiq Bəhramov adına Respublika stadionu

"QƏBƏLƏ": 1. Kamran Ağayev (k), 2. Rail Məlikov, 7. Marat İzmaylov, 8. Nizami Hacıyev, 9. Viktor Mendi, 10. Dodo, 14. Lorenso Ebesilio, 16. Ruslan Tağızadə, 18. İbrahima Niasse, 44. Rafel Santos, 46. Davronjon Erqaşev.

Ehtiyat oyunçular: 30. Anar Nəzirov, 19. Abdulvahid Afolabi, 22. Rodriqo Assis, 31. Daniel Subotiç, 42. Leonardo da Silva, 45. Murad Musayev, 88. Müşfiq Teymurov.

"NEFTÇİ": 30. Saşa Stamenkoviç, 2. Karlos Kardoso, 6. Rəşad Sadiqov (k), 9. Flavinyo, 10. Cavid İmamverdiyev, 15. Erik Ramos, 16. Bruno Bertuççi, 21. Samir Məsimov, 22. Məqsəd İsayev, 32. Elvin Yunuszadə, 90. Ernest Nfor.

Ehtiyat oyunçular: 1. Pavel Doroşev, 3. Denis Silva, 5. İqor Mitreski, 14. Bahodir Nasimov, 19. Mirhüseyn Seyidov, 23. Ruslan Qurbanov, 8. Elşən Abdullayev.