“Qəbələ”nin gələcək məşqçisi: “İnciməyin, qoy reallaşsın, sonra” - MÜSAHİBƏ

“Qəbələ” klubunun baş məşqçisi postuna əsas namizəd Yuri Syominin apasport.az saytına eksklüziv müsahibəsi

- Karyeranızı Azərbaycanda davam etdirmək ehtimalı çoxdur. Sizin kimi adlı-sanlı mütəxəssisin “Qəbələ”də işləyəcəyi rəsmiləşmək üzrədir. Bu barədə nə deyə bilərsiniz?

- (gülür) Xoş sözlərə görə minnətdaram. Ancaq indi bu haqda danışmaq istəmirəm.

- Hər halda, təklif almısınız və bu haqda düşüncələrinizi bilmək maraqlı olardı...

- İnciməyin, hələ şərh verə bilmərəm. Qoy, reallaşsın sonra danışaq.

- Nəzərə alın ki, fikirləriniz bütün postsovet məkanı ölkələri üçün çox maraqlıdır...

- Şərh o vaxt verilə bilər ki, konkret addım atılsın. Ancaq hələlik bir şey olmadığından, qəti cavab verə bilmərəm.

- Azərbaycan futbolu haqda düşüncələriniz necədir?

- Azərbaycan futbolu mənə tanışdır. SSRİ dövründə yaxşı komandalarınız, dahi futbolçularınız olub. Məsələn, Anatoli Banişevski, Kazbek Tuayev, Valeri Hacıyev, Nikolay Semiqlazov, Sergey Kramarenko.

- Sizə tanış olan Azərbaycanda işləməyə maraqlısınız?

- (gülür) Ola bilər. Bunu zaman göstərəcək.

- Agentiniz Dmitri Selyuk Rusiya mətbuatına açıqlamasında “Qəbələ”dən təklif aldığınızı, amma cavab vermək üçün vaxt istədiyinizi və “Lokomotiv”ə qayıtmağın əleyhinə olmadığınızı deyib...

- Buna vaxtı gələndə aydınlıq gələcək.

- “Qəbələ” variantı nə vaxt dəqiqləşəcək?

- İndi bu suala dəqiq cavab verə və Azərbaycana nə vaxt gələcəyimi bilmirəm.