“Qarabağ” yenə çempion ola bilmədi

Ağdamın “Qarabağ” klubu futbol üzrə Topaz Premyer Liqasının XXXIII turunda da çempionluğunu elan edə bilməyib. Lent.az-ın məlumatına görə, baş məşqçi Qurban Qurbanovun komandası bu dəfə “Bakı” ilə səfər matçında xal itirib.

Ardıcıl 3-cü turda qələbəyə həsrət qalan “Qarabağ”ın büdrəməsi ən yaxın izləyicisi “İnter”in işinə yarayıb. “Bankirlər” “Sumqayıt”ı yenərək, liderlə xal fərqini 6-ya endiriblər.

Daha bir maraq doğuran matçda “Neftçi” son oyunlarda inamlı təsir bağışlayan “Qəbələ”yə uduzub. Flaqman ev oyununda hesabda irəli çıxsa da, qonaqlar 2 qol vuraraq, qələbəyə nail olublar. Bununla da baş məşqçi Yuri Syominin komandası Avropa Liqasına vəsiqə verən 4-cü pillədə möhkəmlənib.

Hazırda “Xəzər Lənkəran” – “Rəvan” və “Simurq” – AZAL matçları davam edir.

2 may (cümə)

“Neftçi” (Bakı) – “Qəbələ” – 1:2

Qollar: Cavid İmamverdiyev, 49 – Dodo, 63. Lorenso Ebesilyo, 90

Qırmızı vərəqə: Lorenso Ebesilyo, 90 (“Qəbələ”)

“Bakı” – “Qarabağ” (Ağdam) – 0:0

“İnter” – “Sumqayıt” – 2:0

Qollar: Aleksandr İaşvili, 51. Vaqif Cavadov, 90+2.