“Mauqli” Azərbaycan yığmasında!

Belarusda yaşayan əslən azərbaycanlı kikboksçu və K-1 döyüşləri üzrə tanınmış idmançı Zabit Səmədov Azərbaycanın boks yığmasına cəlb olunub. Lent. az-ın məlumatına görə, Səmədov dünya çempionatına hazırlıq məqsədilə avqustun 24-də Qırğızıstana təlim-məşq toplantısına yola düşəcək.

“Mauqli” ləqəbli idmançı 91 kq çəki dərəcəsində özünü sınayacaq. Onu Avropa çempionu, dünya və 2012-ci il London Yay Olimpiya Oyunlarının bürünc mükafatçısı Teymur Məmmədovla gərgin rəqabət gözləyir.

Millimiz Qırğızıstan boksçuları ilə birgə İssık-Kul gölü sahilində yerləşən Müdafiə Nazirliyinin Tamqa kəndindəki sanatoriyasında məşq edəcək. Komandamız Xəzərin o tayına baş məşqçi Vladimir Zolotaryov və məşqçi Nəriman Abdullayevin rəhbərliyi altında 22 boksçu ilə gedəcək. Heyətə Olimpiya oyunlarının mükafatçıları Məhəmmədrəsul Məcidov (+91 kq), Teymur Məmmədov (91 kq), Avropa çempionu Salman Əlizadə, Elvin Məmişzadə kimi təcrübəli boksçular da daxil edilib.

Yığmamız sentyabrın 18-dək Qırğızıstanda qalacaq. Daha sonra Bakıya qayıdacaq boksçularımız bir müddət istirahət etdikdən sonra bu dəfə Qazaxıstana toplanışa yollanacaqlar. Millimiz oktyabrın 13-də Almatıda start götürəcək dünya çempionatına kimi bu ölkədə qalacaq.

Yığmamızın heyəti:

49 kq: Salman Əlizadə, Münasib Məmmədov

52 kq: Elvin Məmişzadə, Tural Əhmədov, Əbdürrəhman Şirinov

56 kq: İlkin Ağayev, Cavid Çələbiyev

60 kq: Şaban Şahpələngov, Elvin İsayev, Rüstəm Musayev

64 kq: Heybətulla Hacəliyev, Elnur Süleymanov

69 kq: Tamerlan Abdullayev, Pərviz Bağırov

75 kq: Soltan Migitinov, Eldar Quliyev

81 kq: Rauf Rəhimov, Emil Əhmədov

91 kq: Teymur Məmmədov, Zabit Səmədov

+91 kq: Məhəmmədrəsul Məmmədov, Kamran Mehdiyev.