Ömürlük futboldan QOVULUR - oyunları qumara çevirib

"Vest Hem"in yarımmüdafiəçisi Lukas Paket bukmeker kontoru qalmaqalında şübhələrinə görə böyük bəlaya düşüb. Futbol Assosiasiyası futbolçunun ömürlük diskvalifikasiyasını tələb edir.

Lent.az xarici mediaya istinadla bildirir ki, bu hadisə ötən ilin yayında məlum olub. Həmin vaxt “Mançester Siti” Paketi almağa çalışıb. Bununla belə, futbolçu maliyyə gəliri üçün danışılmış oyunlarda şübhəli bilinib.

Bu səbəbdən İngiltərə çempionu braziliyalını almamağa qərar verib. Zaman keçdikcə işin yeni təfərrüatları üzə çıxıb.

Paket dörd oyunda - 2022-ci ildə "Lester"ə, həmçinin 2023-cü ildə "Aston Villa", "Lids" və "Bornmut"a qarşı oyunlarda qəsdən sarı vərəqə almaqda ittiham olunur. İddialara görə, futbolçunun dostları və ailə üzvləri hər şeyə mərc qoyublar.

“The Sun” qəzetinin jurnalistləri bu işin bütün təfərrüatlarını öyrəniblər. Ümumilikdə, 400 funt sterlinqə qədər məbləğdə 60-a yaxın mərc edilib. Nəticədə 100.000 funt sterlinq məbləğində mükafat alınıb.

Mətbuatın yazdığına görə, İngiltərə federasiyası Paket üçün ən ağır cəzanın verilməsini tələb edir. O, braziliyalını ömürlük diskvalifikasiya etmək istəyir.

Lakin məhkəmə bir neçə ay davam edəcək. Bu arada, sübutların toplanması davam edir. Bildirilir ki, futbolçunun özünün də ürəyi sıxılıb və “Vest Hem” onun psixi vəziyyətindən ciddi narahatdır.