Növbə “Qalatasaray”a çatdı...

Bu gün Türkiyədə danışılmış oyunlarla bağlı aparılan istintaq çərçivəsində bu gün ifadə vermək üçün İstanbul Polis İdarəsinə ifadə verməyə çağırılanların sayı 7 nəfərə çatıb. Lent.az-ın Türkiyənin NTV telekanalına istinadən verdiyi məlumata görə, “Qalatasaray” klubunun sabiq idman direktoru Adnan Sezgin, “Manisaspor” klubunun prezidenti Knan Yaralı və bu klubun baş məşqçisi Hikmet Karaman da İstanbul Polis İdarəsinə ifadə verməyə gəliblər.

Xatırladaq ki, bundan əvvəl “Fənərbaxça” klubunun İdarə Heyətinin üzvləri Alaeddin Yıldırım və Ömer Temelli, “Trabzonspor” futbolçusu Serkan Balçı və bu klubun futbol təmsilçisi Özkan Doğan ifadə verməyə çağırılıblar.

Serkan Balçı və Ömer Temellinin ifadəsinin alınması prosesi artıq yekunlaşıb və onlar polis idarəsini tərk ediblər. Digər 5 nəfərin sorğusu isə davam edir. Serkan Balçı jurnalistlərə açıqlamasında deyib ki, polis idarəsinə ifadə vermək üçün gəlmək insanın qürurunu qırsa da, başqa yol yoxdur: “Suallar ünvanladılar, biz də gərəkə cavabları verdik”.