“Qarabağ” da belə getdi...

Lent.az-ın məlumatına görə, Avropa Liqasının III təsnifat mərhələsinin cavab görüşündə Ağdam klubu Belçika “Brügge”sini 1:0 hesabı ilə yensə də, “pley-off”a yüksələ bilməyib.
Buna baş məşqçi Qurban Qurbanovun komandasının Brüsseldəki ilk görüşdə daha böyük fərqlə - 1:4 hesabı ilə uduzması səbəb olub. Tofiq Bəhramov adına Respublika stadionunda keçirilmiş cavab qarşılaşmasında “Qarabağ” üstün oyun sərgiləsə də, istəyinə 87-ci dəqiqədə çatıb. “Bakı”dan transfer olunan Bəxtiyar Soltanov meydana daxil olduqdan 5 dəqiqə sonra qol vurub.

Beləliklə, ötən iki mövsümdə Avropa Liqasının “pley-off” mərhələsinədək irəliləmiş “Qarabağ” bu dəfə turnirlə daha erkən vidalaşıb. Daha öncə Azərbaycan təmsilçilərindən AZAL Avroliqanın I, “Neftçi” Çempionlar Liqasının, “Xəzər Lənkəran” isə Avroliqanın II təsnifat mərhələlərində ilk cəhddəcə mübarizəni dayandırıb. Bu üç komandanın heç biri qələbə qazana bilmədiyi halda, “Qarabağ” 3 dəfə qalib gəlib.