“Uimbldon” turniri: Qadınlarda sensasiya, kişilərdə adi qayda

Lent.az-ın məlumatına görə, qadınların fərdi mübarizəsində sensasiya baş verib.

Dünyanın 1 nömrəli qadın tennisçisi Karolin Voznyatski (Danimarka) reytinqdə 24-cü yeri tutan Dominika Tsibulkovaya (Slovakiya) uduzub – 6:1, 6:7 (5:7), 5:7. Tsibulkova ¼ finalda Mariya Şarapova (Rusiya) ilə üz-üzə gələcək. Şarapova 1/8 finalda Şuay Penq (Çin) üzərində 6:4, 6:2 hesablı qələbə sayəsində mərhələ adlayıb.

Venus və Serena Uilyams bacıları (ABŞ) da mübarizəni dayandırıblar. S.Uilyams Marian Bartoliyə (Fransa) 3:6, 6:7 (6:8), V.Uilyams isə Tsvetana Pironkovaya (Bolqarıstan) 2:6, 3:6 hesabı ilə yenilib. ¼ finalda Bartoli Sabina Lisiçki (Almaniya), Pironkova isə Petra Kvitova (Çexiya) ilə qarşılaşacaq. Daha bir görüş isə Tamira Paşeklə (Avstriya) Viktoriya Azarenka (Belarus) arasında olacaq.

Kişilərin fərdi mübarizəsində isə elə də gözlənilməz nəticə qeydə alınmayıb. ¼ finalda Rafael Nadal (İspaniya) Merdi Fişlə (ABŞ), Endi Mürrey (Böyük Britaniya) Felisiano Lopeslə (İspaniya), Jo-Vilfrid Tsonqa (Fransa) Roje Federerlə (İsveçrə), Bernard Tomiç (Avstraliya) isə Novak Cokoviçlə (Serbiya) görüşəcək.